આ ફેશ્યલ ડાઘ અને કરચલી દૂર કરીને સ્કિન-ટોન સુધારે છે એટલે એનો ક્રેઝ આજકાલ બહુ વધ્યો છે.
પ્રતીકાત્મક તસવીર
ન્યુ મેક્સિકોમાં સુંદર દેખાવા માટે ફેશ્યલ કરાવનારી ત્રણ મહિલાઓ HIV એટલે કે હ્યુમન ઇમ્યુનોડેફિશ્યન્સી વાઇરસથી સંક્રમિત થઈ ગઈ હોવાની વાત સામે આવી છે. આ કોઈ નૉર્મલ ફેશ્યલ નહીં પણ વૅમ્પાયર ફેશ્યલ હતું. વૅમ્પાયર ફેશ્યલ એક લોકપ્રિય સ્કિન ટ્રીટમેન્ટ છે જેમાં વ્યક્તિનું લોહી લઈને એમાંથી પ્લેટલેટ્સ અલગ કરવામાં આવે છે અને એને નાની સોયનો ઉપયોગ કરીને ચહેરા પર ઇન્જેક્ટ કરવામાં આવે છે. આ ફેશ્યલ ડાઘ અને કરચલી દૂર કરીને સ્કિન-ટોન સુધારે છે એટલે એનો ક્રેઝ આજકાલ બહુ વધ્યો છે. જોકે સેન્ટર ફૉર ડિસીઝ કન્ટ્રોલ ઍન્ડ પ્રિવેન્શનના રિપોર્ટમાં થયેલા ખુલાસાએ આવી ‘બ્લડી’ ટ્રીટમેન્ટ કરાવતા લોકોને ચિંતામાં નાખી દીધા છે, કારણ કે HIVથી જ જીવલેણ AIDS એટલે અૅક્વાયર્ડ ઇમ્યુન ડેફિશ્યન્સી સિન્ડૉમ થાય છે.
૨૦૧૮માં ત્રણ મહિલાઓને પોતે HIV પૉઝિટિવ છે એવી જાણ થઈ હતી. જોકે તે એવા કોઈ સંભવિત પરિબળોના સંપર્કમાં આવી નહોતી જેનાથી HIV થાય. મહિલાએ બાદમાં પોતે વૅમ્પાયર ફેશ્યલ દરમ્યાન ઇન્જેક્શનના સંપર્કમાં આવી હોવાનું જણાવ્યું હતું. તપાસમાં એવું સામે આવ્યું કે આ સ્પામાં ઇન્જેક્શન દૂષિત હતાં અને ઇન્ફેક્શન કન્ટ્રોલ પ્રોસીજરનું પણ પાલન કરવામાં આવ્યું નહોતું.
