રિઝર્વ બૅન્ક ઑફ ઇન્ડિયાના આંકડા મુજબ વિદેશી મુદ્રા અસ્કયામતોમાં અને સોનાના ભંડારમાં મોટો વધારો નોંધાયો, અન્ય એક ઘટનામાં RBIએ નિયમભંગ કરવા બદલ ૩ નાણાકીય કંપનીઓ પર પેનલ્ટી ફટકારી છે.
રિઝર્વ બૅન્ક ઑફ ઇન્ડિયા
રિઝર્વ બૅન્ક ઑફ ઇન્ડિયા (RBI) દ્વારા જાહેર કરાયેલા આંકડા મુજબ ૨૮ ઑગસ્ટે પૂરા થયેલા સપ્તાહમાં ભારતનું વિદેશી હૂંડિયામણ (ફૉરેક્સ રિઝર્વ) ૧૦૯૦.૬ અબજ રૂપિયા (૧૧.૪૮ અબજ ડૉલર)ના ઉછાળા સાથે રેકૉર્ડ ૭૦,૩૭૬ અબજ રૂપિયા (૭૪૦.૮૦ અબજ ડૉલર) પર પહોંચી ગયું છે. અગાઉ ફેબ્રુઆરીમાં આ આંકડો ૬૯,૨૦૭ અબજ રૂપિયા (૭૨૮.૫ અબજ ડૉલર) પર હતો.
આ વધારા પાછળ મુખ્ય ફાળો વિદેશી મુદ્રા અસ્કયામતો (FCAs)નો છે, જે ૮૮૭.૩ અબજ રૂપિયા (૯.૩૪ અબજ ડૉલર) વધીને ૫૭,૦૬૩.૬૫ અબજ રૂપિયા (૬૦૦.૬૭ અબજ ડૉલર) થઈ ગઈ છે. આ ઉપરાંત સોનાના ભંડારમાં પણ ૨૦૮.૦૫ અબજ રૂપિયા (૨.૧૯ અબજ ડૉલર)નો વધારો થયો છે. માર્ચથી અત્યાર સુધીમાં દેશના ફૉરેક્સ રિઝર્વમાં સતત વધારો જોવા મળ્યો છે.
અન્ય એક ઘટનામાં RBIએ નિયમભંગ કરવા બદલ ૩ નાણાકીય કંપનીઓ પર પેનલ્ટી ફટકારી છે. એમાં સમ્માન ફિનસર્વ પર ૪.૨ લાખ રૂપિયા, ટ્રાન્સયુનિયન સિબિલ પર ૨૬.૮૨ લાખ રૂપિયા અને ક્રિફ હાઇ માર્ક પર ૬.૮૯ લાખ રૂપિયાનો દંડ લાદવામાં આવ્યો છે.
