શિવસેનાના નેતા અને મહારાષ્ટ્રના ઉદ્યોગપ્રધાન ઉદય સામંતે કહ્યું...

શિવસેનાના નેતા તથા પ્રધાનમંડળમાં ઉદ્યોગ ખાતાના પ્રધાન ઉદય સામંતે મનોજ જરાંગેએ ઑડિયો-ક્લિપ બહાર પાડી ત્યાર પછી પ્રતિક્રિયા આપતાં આ ક્લિપમાં સંભળાતા અવાજ ભારતીય જનતા પાર્ટી (BJP)ના નેતાઓના અવાજ જેવા લાગતા હોવાનું કહ્યું હતું. નાયબ મુખ્ય પ્રધાન એકનાથ શિંદે અને સંસદસભ્ય શ્રીકાંત શિંદેને બદનામ કરવા માટેનું આ કાવતરું હોવાનું તેમણે જણાવ્યું હતું. ઉદય સામંતે કહ્યું હતું કે ‘આ ઑડિયો-ક્લિપમાં જે અવાજ સંભળાઈ રહ્યા છે એ BJPનાં પ્રવક્તા શ્વેતા શાલિની, BJPના વિધાનસભ્ય અતુલ ભાતખળકર અને BJPથી જોડાયેલા યુટ્યુબર સુશીલ કુલકર્ણીના અવાજ જેવા જ છે. મુખ્ય પ્રધાન દેવેન્દ્ર ફડણવીસે આ ઑડિયો-ક્લિપમાં કોના અવાજ છે તેમની ઓળખ કરવા માટે તપાસનો આદેશ આપવો જોઈએ. હું એવું નથી કહેતો કે આ બધું દેવેન્દ્ર ફડણવીસની જાણમાં થયું હશે અને શીર્ષ નેતૃત્વની સલાહ લઈને કરવામાં આવ્યું હશે. એથી સત્ય બહાર આવે એ માટે દેવેન્દ્ર ફડણવીસજીએ આની તપાસ કરાવવી જોઈએ.’

જરાંગેએ શું માલ પટાવ્યો છે, મારી પાસે પણ જરાંગેની ઑડિયો-ક્લિપ : અજય બારસકર

ઑડિયો-ક્લિપના મુદ્દે મનોજ જરાંગેના જ ભૂતપૂર્વ સાથીદાર અજય બારસકરે મનોજ જરાંગે પર નિશાન સાધ્યું હતું અને કહ્યું હતું કે ‘શું રાવ, આ તો ખોદ્યો ડુંગર અને નીકળ્યો ઉંદર જેવું થઈ ગયું. આવી ફાલતુ ક્લિપ સંભળાવવા પાછળ મનોજ જરાંગેનો હેતુ શું છે? ૮ મહિના સુધી કેમ તેમણે આ ક્લિપ છુપાવીને રાખી હતી? આવી જ એક મનોજ જરાંગે વિશેની ક્લિપ મારી પાસે પણ છે. આ ક્લિપમાં મનોજ જરાંગેના ખૂબ જ નજીકના બે મિત્રો વાત કરી રહ્યા છે અને બોલી રહ્યા છે કે જરાંગેએ શું માલ પટાવ્યો છે, પિંપરી-ચિંચવડનો માલ છે; જરાંગે જ્યાં જાય, જ્યાં પ્રવાસ કરે તે મહિલા તેની સાથે હોય છે; જરાંગે મારી વિરુદ્ધ પોલીસ-ફરિયાદ કરે પછી હું એ ક્લિપ પોલીસને સોંપીશ.’