NCPના નેતા છગન ભુજબળના PAને આવો ફોન કરીને ધમકી આપનારાની ધરપકડ કરવામાં આવી
NCPના નેતા છગન ભુજબળ
નૅશનલિસ્ટ કૉન્ગ્રેસ પાર્ટી (NCP)ના વરિષ્ઠ નેતા અને રાજ્યના ભૂતપૂર્વ પ્રધાન છગન ભુજબળના પર્સનલ અસિસ્ટન્ટ (PA) આબાસાહેબ ગાયકવાડને ૨૩ એપ્રિલથી ૧૬ મે દરમ્યાન વારંવાર ફોન કરીને એક કરોડ રૂપિયાની ખંડણી માગવાના આરોપસર પોલીસે ગઈ કાલે ઉચ્ચ શિક્ષિત યુવક રાહુલ ભુસારેની ધરપકડ કરી હતી.
પોલીસના જણાવ્યા મુજબ આરોપી રાહુલ ભુસારે છગન ભુજબળના PAને જુદા-જુદા નંબર પરથી સતત ફોન કરીને કહતો હતો કે ‘હું ઇન્કમ-ટૅક્સનો અધિકારી બોલું છું. તમારા સાહેબના યંબકેશ્વરના ફાર્મહાઉસમાં બહુ માલ રાખ્યો છે. અહીં ઇન્કમ-ટૅક્સનો દરોડો પડવાનો છે. એ ટીમમાં હું પણ છું. તમને મદદની જરૂર હોય તો એક કરોડ રૂપિયા આપવા પડશે. રૂપિયા નહીં આપો તો કાર્યવાહી કરવામાં આવશે.’
ADVERTISEMENT
ધમકીના સતત આવા ફોન આવ્યા બાદ આબાસાહેબ ગાયકવાડે નાશિક પોલીસમાં ફરિયાદ નોંધાવી હતી. પોલીસની ક્રાઇમ બ્રાન્ચે ખંડણી માગવાની સાથે ધમકી આપવાના આ મામલામાં તપાસ કરવા માટે એક ટીમ બનાવીને આરોપીને પકડવા છટકું ગોઠવ્યું હતું. આરોપીએ પહેલાં રૂપિયા લઈને ગુજરાતમાં આવવાનું કહ્યું હતું, પરંતુ બાદમાં અચાનક પ્લાન બદલીને નાશિકના જ કરંજાળી ખાતેની એક હોટેલમાં બોલાવ્યો હતો. પોલીસે હોટેલમાં પહોંચીને ૨૭ વર્ષના ઉચ્ચ શિક્ષિત રાહુલ ભુસારે નામના યુવકની ધરપકડ કરીને તેની પાસેથી ૮૫,૦૦૦ રૂપિયાની કિંમતનો મુદ્દામાલ પકડ્યો હતો. આરોપી રાહુલ ભુસારે કોણ છે અને તેણે છગન ભુજબળ પાસેથી ખંડણી માગવા માટે શા માટે ફોન કર્યા હતા એની તપાસ પોલીસે શરૂ કરી છે.
