GSB સેવા મંડળનો ભક્તોને અનુરોધ
GSB સેવા મંડળના ગણપતિનાં પ્રથમ દર્શન ગઈ કાલે કરાવવામાં આવ્યાં હતાં
મુંબઈમાં ગૌડ સારસ્વત બ્રાહ્મણ (GSB) સેવા મંડળના ગણપતિબાપ્પાના આ વર્ષનાં પ્રથમ દર્શન સોમવારે કરાવવામાં આવ્યાં હતાં. આ વર્ષે આ મંડળના ગણેશોત્સવનું ૭૧મું વર્ષ છે. કિંગ્સ સર્કલ અને વડાલામાં બિરાજતા GSB સેવા મંડળના ગણપતિબાપ્પાના આ મંત્રમુગ્ધ કરે એવા સ્વરૂપનાં દર્શન પાંચ દિવસ સુધી થઈ શકશે. આ વર્ષે બાપ્પાની પાછળ મુકાતી વિવિધ ચિહ્નોવાળી ચાંદીની નવી પ્રભાવરીનું પણ અનાવરણ કરવામાં આવ્યું હતું. પંડાલમાં પ્રવેશતાં જ મંત્રોચ્ચાર, પરંપરાગત પૂજાવિધિ અને પવિત્રતાનો અનુભવ કરાવતા આ મંડળે આ વર્ષે દર્શનાર્થીઓ હિન્દુ પરંપરા અનુસારનાં ટ્રેડિશનલ કપડાં પહેરીને આવે એવો આગ્રહ રાખ્યો છે.
474+ કરોડ રૂપિયાના વીમાનું બ્રેકઅપ કઈ રીતે?
ADVERTISEMENT
દેશના સૌથી શ્રીમંત કહેવાતા આ બાપ્પા માટે આ વર્ષે ૪૭૪.૪૬ કરોડ રૂપિયાનો વીમો લેવામાં આવ્યો છે. ગયા વર્ષે બાપ્પાનું ઇન્શ્યૉરન્સ-કવર ૪૦૦.૫૮ કરોડ રૂપિયાનું હતું. GSBના ગણપતિને ૬૯ કિલો સોનાનાં આભૂષણો અને ૩૩૬ કિલો ચાંદી તેમ જ અન્ય કીમતી વસ્તુઓ દાન-ભેટરૂપે મળી હોવાથી દર વર્ષે બાપ્પાનો કરોડો રૂપિયાનો વીમો ઉતરાવવામાં આવે છે.
વીમાની રકમમાં ૩૭૫ કરોડ રૂપિયા સ્વયંસેવકો, રસોઈયા, પૂજારીઓ, ચંપલના સ્ટૉલ સાચવનાર સેવકો અને ગાર્ડ સહિત સેવામાં ઉપસ્થિત લોકો માટે અને ૩૦ કરોડ ભક્તો, સ્ટેડિયમ, મંડપ વગેરે માટે ફાળવવામાં આવ્યા છે. સમાજના પછાત વર્ગ અને જરૂરિયાતમંદો માટે આ મંડળ કાર્યરત છે.
