Health Funda: આજકાલ લગ્ન-પ્રસંગમાં આઇવી ડ્રિપ કોર્નરનો ટ્રેન્ડ બહુ વધી રહ્યો છે, શું છે આઇવી ડ્રિપ કોર્નર? ડૉ. રિશિતા બોચિયા જોષી સમજાવે છે કે, આ મોર્ડન ટ્રેન્ડની આપણને જરુરત છે ખરી?! શું આ ટ્રેન્ડ સલામત છે?
તસવીર ડિઝાઇનઃ કિશોર સોસા
સુંદર અને ટકાઉ ઘર બનાવવા મજબૂત પાયો, સારી અને યોગ્ય સામગ્રી તેમજ કુશળ કામદારોની જરૂર પડે છે તેમ આપણા શરીરનું સર્વાંગી સ્વાસ્થ્ય જળવાય તે માટે ખોરાક, કસરત અને મનની સ્વસ્થતા જરૂરી છે. ખોરાક આપણા શરીરને ઊર્જા આપે છે. નિયમિત કસરત શરીરને મજબૂત બનાવે છે, સાથે સાથે મનને તેજ અને તણાવમુક્ત રાખે છે. આમ સર્વાંગી સ્વાસ્થ્ય માટે તન અને મન બન્ને સ્વસ્થ હોવા ખૂબ જરુરી છે. સોશ્યલ મીડિયા જ્યારે આંગળીના ટેરવે છે ત્યારે સરળતાથી માહિતી મળી જાય કે, સર્વાંગી સ્વાસ્થ્ય માટે શું ખાવું જોઈએ? ડાયટિંગમાં કઈ બાબતોનું ધ્યાન રાખવું? કઈ કસરત કરવી જોઈએ? માનસિક શાંતિ માટે શું જરુરી છે? વગેરે વગેરે બધી જ માહિતી મળી જાય છે. પરંતુ વ્યક્તિ દીઠ દરેક બાબત જુદી-જુદી હોય છે. પણ સર્વાંગી સ્વાસ્થ્યને લગતી કેટલીક બાબતો બહુ કૉમન હોય છે. તમને મૂંઝવણ થતી હોય કે સુખાકારી અને સર્વાંગી સ્વાસ્થ્ય માટે શું કરવું તો ગુજરાતી મિડ-ડે ડોટ કોમ તમારી માટે લઈને આવ્યું છે – ‘હેલ્થ ફંડા’ (Health Funda). જેમાં દર શનિવારે ‘હેલ્થ એન ફૂડવિલા’ (Health n Foodvilla)નાં ડાયટિશન અને ફૂડ ન્યુટ્રિશનિસ્ટ, હોલિસ્ટિક ફંક્શનલ હેલ્થ કૉચ ડૉ. રિશિતા બોચિયા જોષી (Dr. Rishita Bochia Joshi) ખોરાક, શારિરીક સ્વાસ્થ્ય અને માનસિક સ્વાસ્થ્યને લગતા વિષયો પર આપણી સાથે વાત કરશે.
‘હેલ્થ ફંડા’ ના ગત એપિસોડમાં ડૉ. રિશિતા બોચિયા જોષીએ શિયાળામાં ડિહાઇડ્રેશનના ભય અને આ ઋતુમાં પણ પાણી પીવાનું કેટલું મહત્વ છે તે વિશે ચર્ચા કરી હતી હવે આજના ‘હેલ્થ ફંડા’ના એપિસોડમાં ડૉ. રિશિતા બોચિયા જોષી વાત કરે છે કે, લગ્નપ્રસંગમાં વધતા જતા ટ્રેન્ડ આઇવી ડ્રિપ કોર્નર વિશે. શું ખરેખર આઇવી ડ્રિપનો આ કનસેપ્ટ સલામત છે?!
ADVERTISEMENT
ભારત વર્ષના સૌથી આકર્ષક સમય - લગ્નની મોસમનો અત્યારે આનંદ માણી રહ્યું છે. એક પછી એક ફંક્શન્સ કાર્નિવલ, કોકટેલ નાઈટ, સંગીત, મહેંદી અને ફેરા સાથે આનંદ-ઉત્સવ અને મનગમતી વાનગીઓ આરોગવાનો આ સમય છે. પણ જ્યારે સતત એક પછી એક બેક-ટુ-બેક લગ્ન સમારંભમાં હાજરી આપવાનો સમય આવે છે ત્યારે ઘણીવાર આપણું શરીર થાકી જાય છે અને વેડિંગ ઈનવિટેશનના એ કેલેન્ડર સાથે કદમથી કદમ મિલાવીને ચાલવામાં મુશ્કેલી પડે છે.
આખા અઠવાડિયા સુધી ચાલતા, ભવ્ય લગ્ન સમારોહ દરમિયાન ઉર્જાવાન રહેવું અને ચમકતી ત્વચા જાળવી રાખવી એ કોઈપણ કન્યા કે વરરાજા માટે સૌથી મોટા પડકારોમાંનો એક હોઈ શકે છે. દરમિયાન કોકલેટ પાર્ટી અને પ્રી-વેડિંગ પાર્ટીમાં આલ્કોહોલના સેવવને લીધે તે શરીરની સિસ્ટમને વધુ ડિહાઇડ્રેટ કરે છે અને રેપિડ આઇ મૂવમેન્ટ (REM) ઊંઘમાં ખલેલ પહોંચાડે છે, જેના કારણે તાજગીથી જાગવું મુશ્કેલ બને છે. ખાંડ, તળેલા ખોરાક અને ઓછા પાણીના સેવનને કારણે ત્વચા પણ નિસ્તેજતા, સોજા અને બ્લેકઆઉટ્સ સાથે તણાવના ચિહ્નો બતાવવાનું શરૂ કરે છે.
આ સમગ્ર પરિસ્થિતિને નિયંત્રિત કરવા માટે લગ્નમાં આઇવી ડ્રિપ કોર્નરનો નવો ટ્રેન્ડ સામાન્ય બની રહ્યો છે. આ મોર્ડન ટ્રેન્ડને મહેમાન-નવાઝીનું નામ આપી દેવામાં આવ્યું છે. લગ્નના ફંક્શનમાં રાખવામાં આવેલ આઇવી ડ્રિપ કોર્નરમાં ઓફર થતી સેવાઓ મહેમાનો અને દંપતીને થાક, હેંગઓવર અને લાંબા ચાલતા વેડિંગ ફંક્શનની સામાન્ય માંગણીઓમાંથી બહાર આવવામાં મદદ કરવા માટે ઝડપી હાઇડ્રેશન અને વિટામિન ઇન્ફ્યુઝન આપે છે.
પણ શું આઇવી ડ્રિપનો આ કનસેપ્ટ ખરેખર સલામત છે? તો તેનો જવાબ છે, ના. લગ્નોમાં આઇવી ડ્રિપ્સ બહુ કેઝ્યુઅલ થઈ ગયા છે પણ તે સલામત નથી અને તેને ટ્રેન્ડ તરીકે ન લેવો જોઈએ.
આ છે ચિંતાના કારણોઃ
૧. લગ્નોમાં સ્વચ્છતાના જોખમો:
લગ્ન-પ્રસંગમાં ભીડ હોય છે જેના કારણે યોગ્ય સ્વચ્છતા જાળવવી મુશ્કેલ બને છે, જે ગંભીર સ્વાસ્થ્ય સમસ્યાઓ તરફ દોરી શકે છે.
૨. તબીબી દેખરેખનો અભાવ:
આઇવી સારવાર માટે પ્રશિક્ષિત તબીબી વ્યાવસાયિકો દ્વારા કાળજીપૂર્વક દેખરેખની જરૂર પડે છે, જે લગ્ન-પ્રસંગમાં મેનેજ કરવું મુશ્કેલ છે.
૩. ઇન્જેક્શનના જોખમો:
નસમાં પ્રવાહી ઇન્જેક્ટ કરવાથી અનેક જોખમો રહે છે. જેમ કે… ઇન્જેક્શન સાઇટ પર ચેપ લાગવો; નસોમાં બળતરા થવી અથવા નસોને નુકસાન થવું; આઇવીમાં રહેલા પ્રવાહી અથવા વિટામિન્સ પ્રત્યે એલર્જીક પ્રતિક્રિયાઓ; જો આઇવીમાં મિશ્રણ અથવા માત્રા ખોટી હોય તો ઇલેક્ટ્રોલાઇટ અસંતુલન અથવા વિટામિન ઓવરડોઝની તકલીફ; લોહીમાં હવા જેવી દુર્લભ પરંતુ ગંભીર સમસ્યાઓ; એર એમ્બોલિઝમ (લોહીના પ્રવાહમાં હવા) જેવી દુર્લભ પરંતુ ગંભીર ઘટનાઓનું જોખમ રહે છે.
આઇવી ડ્રિપ કોર્નરને બદલે આ વિકલ્પ કરો પસંદ
આ બધી મુશ્કેલીઓને ધ્યાનમાં રાખીને યજમાન પોતાના મહેમાનોના સ્વાસ્થ્ય માટે આનાથી વધુ સારા, સરળ વિકલ્પો ચોક્કસપણે પસંદ કરી શકે છે.
૧. ઇલેક્ટ્રોલાઇટથી ભરપૂર પીણાં
નાળિયેર પાણી અથવા ઓરલ રિહાઇડ્રેશન સોલ્યુશન્સ (ORS) જેવા પીણાં પીરસો જેથી શરીરમાં સોલ્ટ અને મિનરલ્સ જળવાઈ રહે અને મહેમાનો ઉર્જાવાન રહે.
૨. ફંક્શન સમય અને ભોજન સમયનું પાલન કરો
બહુ મોડી રાત સુધીના ફંક્શન ન રાખો. તેમજ ફંક્શન દરમિયાન ભોજનના સમયનું ખાસ ધ્યાન રાખો. જેથી મહેમાનો મોડી રાતનું ભોજન ટાળી શકે અને સરખો આરામ અને વ્યવસ્થિત ઊંઘ પણ લઈ શકે.
૩. આલ્કોહોલ કોર્નરને બદલે સ્વસ્થ વિકલ્પોની પસંદગી
આલ્કોહોલને બદલે આંતરડાના સારા સ્વાસ્થ્યને પ્રોત્સાહન આપવા માટે ડિટોક્સ પાણી, જીરાનું પાણી, અજમાનું પાણી અથવા છાશ જેવા પ્રોબાયોટિક પીણાં ઓફર કરો.
૪. ફુટ મસાજ કોર્નર
મહેમાનોને આરામનો અનુભવ કરાવવા અને પગ કે પગમાં થતા દુખાવા વગર લગ્નના પ્રસંગોનો આનંદ માણવામાં મદદ કરવા માટે ફૂટ મસાજકોર્નર રાખી શકાય.
૫. સંતુલિત ભોજનના વિકલ્પો
સ્વસ્થ ભોજન અને કેલરીવાળા ફૂડના ઓપ્શન્સ આપો. જેનાથી મહેમાનો સમજદારીપૂર્વક પસંદગી કરી શકે અને બ્લોટિંગ જેવી સમસ્યા ન થાય.
લગ્ન-પ્રસંગને માણો, થાકો નહીં
લગ્ન-પ્રસંગ આનંદકારક, યાદગાર અને અર્થપૂર્ણ હોવા જોઈએ, વૈભવના વેશમાં છુપાયેલા અસુરક્ષિત તબીબી પ્રેક્ટિસ માટેનું સ્થળ નહીં! સરળ, સભાન ટેવો સાથે તમે તમારા સ્વાસ્થ્ય અથવા ચહેરાની ચમકને નુકસાન પહોંચાડ્યા વિના દરેક ઉજવણીનો આનંદ માણી શકો છો. એટલું સમજીએ કે, સાચી વૈભવી સંતુલન છે.
(શબ્દાંકનઃ રચના જોષી)
