બોરીવલીના રાજેશ આશર પરિવાર દ્વારા છેલ્લાં ૫૦ વર્ષથી એક જ નાની ગણેશમૂર્તિની સ્થાપના કરી પૂજા કરવામાં આવે છે. મૂર્તિનું વિસર્જન કરવાને બદલે તેને વર્ષભર ઘરમાં રાખી પર્યાવરણ જાળવણીનો સંદેશ આપવામાં આવે છે.
બોરીવલીમાં ૫૦ વર્ષથી એક જ ગણેશમૂર્તિની કરાયેલી સ્થાપના.
ગણેશચતુર્થીના પાવન પર્વ દરમ્યાન સામાન્ય રીતે ગણેશમૂર્તિની સ્થાપના બાદ વિસર્જનની પરંપરા જોવા મળે છે. જોકે બોરીવલી-વેસ્ટમાં હર્મેશ સોસાયટીમાં રહેતો એક પરિવાર છેલ્લાં ૫૦ વર્ષથી એક જ ગણેશમૂર્તિની સ્થાપના અને પૂજા કરીને પર્યાવરણ જાળવણીનો અનોખો સંદેશ આપી રહ્યો છે. રાજેશ આશર પરિવાર દ્વારા મૂર્તિનું વિસર્જન કરવામાં આવતું નથી, પરંતુ અેને વર્ષભર ઘરમાં જ રાખવામાં આવે છે. આ પરિવારના ગણેશજીની મૂર્તિ ૬ ઇંચથી પણ નાની છે. છેલ્લા પાંચ દાયકાથી દર વર્ષે આ જ મૂર્તિની શ્રદ્ધાપૂર્વક સ્થાપના કરી પૂજા કરવામાં આવે છે. મૂર્તિનું વિસર્જન ન કરવાના નિર્ણયથી પર્યાવરણને નુકસાન ન થાય અેવો પ્રયાસ કરવામાં આવે છે. ગણેશોત્સવમાં કરવામાં આવતો શણગાર પણ ઇકો-ફ્રેન્ડ્લી છે. ટેબલ પર ગોઠવવામાં આવતા બૅકડ્રૉપ, સૂરજમુખીનાં ચક્ર, ઝાલર, કટઆઉટ્સ સહિતની મોટા ભાગની વસ્તુઓ પુનઃવપરાશ કરી શકાય અેવી ઉપયોગ કરવામાં આવે છે અને દર વર્ષે અેનો ફરી ઉપયોગ કરવામાં આવે છે. આ ઉપરાંત પૂજામાં વપરાતાં ફૂલ ને ગલગોટાનાં ફૂલોનું જળાશયમાં વિસર્જન કરવાને બદલે વૃક્ષો અને છોડનાં મૂળમાં નાખવામાં આવે છે જેથી અે કુદરતી ખાતર તરીકે ઉપયોગી બને. આમ, ધાર્મિક શ્રદ્ધાની સાથે પર્યાવરણની સુરક્ષાને પણ પ્રાધાન્ય આપતી આ ઉજવણી સમાજ માટે પ્રેરણાદાયી ઉદાહરણ બની રહી છે.
