જાણીતા ફૅશન-ડિઝાઇનરે પોતાના આઉટફિટ દ્વારા ભારતની હસ્તકલા અને મુંબઈને આપી અનોખી શ્રદ્ધાંજલિ
આ આઉટફિટની કેપમાં મુંબઈ શહેરની સંસ્કૃતિ અને એની ઓળખ દર્શાવતા વિવિધ તત્ત્વો પણ ઉમેરવામાં આવ્યાં હતાં
ફૅશન-ડિઝાઇનર મનીષ મલ્હોત્રાએ મેટ ગાલા 2026માં પોતાના ખાસ લુકથી બધાનું ધ્યાન ખેંચ્યું હતું. મનીષે આ પ્રસંગે કાળા રંગનું પરંપરાગત બંધગલા પહેર્યું હતું, જેને એક વિશિષ્ટ આર્કિટેક્ચરલ કેપ સાથે સ્ટાઇલ કરવામાં આવ્યું હતું. આ કેપ માત્ર ફૅશન-સ્ટેટમેન્ટ નહોતી, પરંતુ ભારતીય હસ્તકલા અને કલાકારોની મહેનતને સમર્પિત એક ખાસ અભિવ્યક્તિ હતી. આ કેપને તૈયાર કરવામાં કુલ ૯૬૦ કલાક લાગ્યા હતા અને એને બનાવવામાં ૫૦થી વધુ કલાકારોનો સમાવેશ થયો હતો.
આ ખાસ આઉટફિટમાં દોરી વર્ક, જરદોશી, ચિકનકારી અને કસબ જેવી પરંપરાગત વણાટકામની ટેક્નિકનો ઉપયોગ કરવામાં આવ્યો હતો. આ લુકની સૌથી અનોખી વાત એ હતી કે કેપ પર કામ કરનાર કલાકારોનાં નામ અને સહી પણ વણાટમાં સામેલ કરવામાં આવ્યાં હતાં. આ રીતે મનીષ મલ્હોત્રાએ ફૅશનજગતમાં ઘણી વાર અજાણ રહેતા હસ્તકલાકારોને ઓળખ અને સન્માન આપવાનો પ્રયત્ન કર્યો.
ADVERTISEMENT
આ આઉટફિટની કેપમાં મુંબઈ શહેરની સંસ્કૃતિ અને એની ઓળખ દર્શાવતા વિવિધ તત્ત્વો પણ ઉમેરવામાં આવ્યાં હતાં જેમાં શહેરનાં જાણીતાં સ્થળો અને રોજિંદા જીવનનાં દૃશ્યોનો સમાવેશ થાય છે. મનીષ મલ્હોત્રાએ જણાવ્યું કે આ લુક તેના માટે ખૂબ જ પર્સનલ હતો, કારણ કે એ મુંબઈ સાથેનાં તેના જીવન, સિનેમા અને ડિઝાઇન-સફરને દર્શાવે છે.
