બે બિલાડીઓએ લૅન્ડસ્લાઇડિંગ વખતે આ કપલનો જીવ બચાવી લીધો
કપલ
જ્યારે માલિક પર કોઈ મુસીબત આવવાની હોય ત્યારે પાળેલા પ્રાણીઓ જે વફાદારી દાખવતાં હોય છે એ કાબિલેદાદ છે. મોટા ભાગે આવા કિસ્સાઓ ડૉગીઓના વધુ સાંભળવા મળે છે, પરંતુ ઇટલીના લિગુરિયામાં ક્લોડિયો પિયાના અને તેની પત્ની સબરિનાને તેમની બે પાળેલી બિલાડીઓએ બચાવી લીધા હતા. જ્યારે લૅન્ડસ્લાઇડિંગ થયું એ વખતે દંપતી પોતાના ઘરમાં સૂઈ રહ્યું હતું. ભૂસ્ખલનની અસર તેમના ઘર સુધી પહોંચે એ પહેલાં જ તેમની પાળેલી બિલાડીઓ સિમ્બા અને મોસે જોરજોરથી અવાજો કરીને યુગલને જગાડી દીધું હતું. એ જ વખતે ઊઘમાંથી જાગેલી પત્નીએ જોયું કે છત પરથી પ્લાસ્ટરના ટુકડા પડવા શરૂ થઈ ગયા છે. બીજી તરફ દીવાલો પર પણ તિરાડો પડવાની શરૂ થઈ ગઈ હતી. એ જોઈને તરત જ દંપતી ઘરમાંથી બહાર નીકળી આવ્યું અને જે પળે તેઓ બહાર નીકળ્યા એની ત્રીજી ક્ષણે મકાન પત્તાંના મહેલની જેમ ફસકી ગયું.
આ પણ વાંચો : 120 વર્ષ જૂની દીવાદાંડી ઊંચકીને 80 મીટર દૂર ખસેડાઈ
ADVERTISEMENT
હાલમાં લિગુરિયામાં ભારે વરસાદને કારણે નદીઓ છલકાઈને તોફાને ચડી છે. ભૂસ્ખલનથી બચવા દંપતી પોતાની કાર તરફ ભાગ્યું, પણ ત્યાં સુધી પહોંચે એ પહેલાં કીચડમાં ફસાઈ ગયું. જોકે રાહતકર્મીઓએ યુગલ અને તેમની બન્ને બિલ્લીઓને કાદવમાંથી બચાવી લીધા હતા.