શુક્રવારે દિલ્હી-વારાણસીમાં ધૂળની આંધી અને જેસલમેરના રણમાં કરાવૃષ્ટિ થઈ
ગઈ કાલે પટનામાં ગાંધી મેદાનમાં ધૂળની જોરદાર ડમરીથી પોતાને બચાવતા લોકો
દેશભરમાં ગરમીની શરૂઆત થયા પછી ફરી મોસમ બદલાઈ છે. ગઈ કાલે રાજસ્થાનના રણવિસ્તારો બિકાનેર અને જેસલમેરમાં કરાવૃષ્ટિ થઈ હતી. જયપુર સહિત ૭ જિલ્લાઓમાં ભારે વરસાદ થયો હતો અને અનેક ગામોમાં ધૂળની ડમરીઓ ઊડી હતી. દિલ્હી-વારાણસીમાં પણ તેજ આંધીએ વાતાવરણને ધૂળથી ભરી દીધું હતું અને પછી વરસાદ પડ્યો હતો.
હવામાન વિભાગે જણાવ્યું છે કે વેસ્ટર્ન ડિસ્ટર્બન્સને કારણે આજે હિમાચલ પ્રદેશ અને ઉત્તરાખંડમાં હળવાથી મધ્યમ પ્રકારનો વરસાદ અને બરફવર્ષા થઈ શકે છે અને સાથે હિમસ્ખલનની સંભાવનાઓને કારણે અટલ ટનલ રોહતાંગના નૉર્થ પોર્ટલ પર સહેલાણીઓની એન્ટ્રી રોકી દેવામાં આવી છે. જમ્મુ-કાશ્મીર અને લદ્દાખમાં હળવા વરસાદની આગાહી છે. બીજી તરફ પંજાબ, હરિયાણા, દિલ્હી, ઉત્તર પ્રદેશ, બિહાર અને રાજસ્થાનમાં વીજળીના કડાકા સાથે વરસાદ અને ચક્રવાતની આગાહી છે. ૫૦થી ૬૦ કિલોમીટરની સ્પીડથી પવન ફૂંકાઈ શકે છે.
ADVERTISEMENT
જમ્મુ-કાશ્મીર, હિમાચલ પ્રદેશ, પંજાબ, દિલ્હી, હરિયાણા, ચંડીગઢ, રાજસ્થાન, મધ્ય પ્રદેશમાં વરસાદની સંભાવના છે. પૂર્વોત્તર ભારતમાં મણિપુર, નાગાલેન્ડ, ત્રિપુરા અને મિઝોરમમાં વરસાદ અને વીજળીના ચમકારાની આગાહી છે. અરુણાચલ પ્રદેશમાં આવતી કાલે પણ વરસાદની આગાહી છે.
આસમાનમાં ૧૦૦૦ કિલોમીટરનાં કાળાં વાદળાં
પાકિસ્તાન અને ઉત્તર ભારતના આસમાનમાં ૧૦૦૦ કિલોમીટર લાંબાં કાળાં વાદળાં છવાયેલાં છે. એને કારણે ઉત્તર ભારતમાં આગામી ૨૪ કલાકમાં પવન ફૂંકાવાની સાથે વાદળાં ગરજીને વરસાદ પડવાની સંભાવના છે.
