ઇલૉન મસ્કની કંપની સ્પેસએક્સનું શક્તિશાળી રૉકેટ સ્ટારશિપ ત્રીજા પ્રયાસમાં ટેસ્ટ-ફ્લાઇટની પ્રક્રિયા પૂર્ણ કરવામાં સક્સેસ રહ્યું, પણ પૃથ્વી પર આવતાં પહેલાં જ એ તૂટી ગયું
રૉકેટ સ્ટારશિપ ત્રીજા પ્રયાસમાં અવકાશમાં ટેસ્ટ-ફ્લાઇટની પ્રક્રિયા પૂર્ણ કરવામાં સફળ
ઇલૉન મસ્કની કંપની સ્પેસએક્સનું મહત્ત્વાકાંક્ષી રૉકેટ સ્ટારશિપ ત્રીજા પ્રયાસમાં અવકાશમાં ટેસ્ટ-ફ્લાઇટની પ્રક્રિયા પૂર્ણ કરવામાં સફળ રહ્યું હતું. આ વખતે સ્ટારશિપ પહેલા બે પ્રયાસની સરખામણીમાં વધુ આગળ પહોંચી ગયું હતું, પરંતુ પૃથ્વી પર પરત ફરતી વખતે એની સાથેનો સંપર્ક તૂટી ગયો હતો. આ મિશનનું લાઇવ વેબકાસ્ટ થયું હતું. એ દરમ્યાન સ્પેસએક્સ તરફથી કહેવામાં આવ્યું હતું કે હાઈ પર્સોનિક સ્પીડમાં આવતું સ્પેસક્રાફ્ટ પૃથ્વીના વાતાવરણમાં પ્રવેશતાં જ બે સૅટેલાઇટ સિસ્ટમથી ડિસકનેક્ટ થઈ ગયું હતું. સાઉથ ટેક્સસમાં કંપનીના સ્ટારબેઝ બોકા ચિકાથી આ સ્પેસક્રાફ્ટ સવારે ૮.૨૫ વાગ્યે લૉન્ચ થયું હતું. એના એક કલાક બાદ ટેસ્ટ-ફ્લાઇટ પૂરી કરીને આ સ્પેસક્રાફ્ટ હિન્દ મહાસાગરમાં ઊતરવાનું હતું.
સ્ટારશિપનું આ પરીક્ષણ મહત્ત્વનું એટલા માટે પણ છે કારણ કે એની યોજના અવકાશયાત્રીઓને ચંદ્ર પર મોકલવાની છે. ગયા વર્ષે સ્ટારશિપ રૉકેટનાં બે પરીક્ષણ થયાં હતાં અને બન્ને વખતે પ્રક્ષેપણની મિનિટો બાદ એ નષ્ટ થઈ ગયું હતું. યુએસ સ્પેસ એજન્સી અને સ્પેસએક્સની મુખ્ય કસ્ટમર નાસાએ સફળ ટેસ્ટ-ફ્લાઇટ બદલ ઇલૉન મસ્કની કંપનીને અભિનંદન આપ્યાં હતાં. સ્પેસએક્સનું એન્જિનિયરિંગ એરોસ્પેસ ઇન્ડસ્ટ્રીની અન્ય કંપનીઓ કરતાં વધુ રિસ્ક ખમી શકે એવું છે. સ્ટારશિપની સરખામણીમાં નાસાની સ્પેસ લૉન્ચ સિસ્ટમ પણ અડધું જ થ્રસ્ટ પેદા કરે છે.
