રશિયન રાષ્ટ્રપતિ વ્લાદિમીર પુતિને સોમવારે વડાપ્રધાન નરેન્દ્ર મોદી સાથે ટેલીફોન પર વાત કરી. આ વાત દરમિયાન રાષ્ટ્રપતિ પુતિને ગયા અઠવાડિયે અલાસ્કામાં અમેરિકન રાષ્ટ્રપતિ ડોનાલ્ડ ટ્રમ્પની સાથે પોતાની મુલાકાત વિશે પોતાનો મત વ્યક્ત કર્યો.
તસવીર સૌજન્ય મિડ-ડે
રશિયન રાષ્ટ્રપતિ વ્લાદિમીર પુતિને સોમવારે વડાપ્રધાન નરેન્દ્ર મોદી સાથે ટેલીફોન પર વાત કરી. આ વાત દરમિયાન રાષ્ટ્રપતિ પુતિને ગયા અઠવાડિયે અલાસ્કામાં અમેરિકન રાષ્ટ્રપતિ ડોનાલ્ડ ટ્રમ્પની સાથે પોતાની મુલાકાત વિશે પોતાનો મત વ્યક્ત કર્યો. અમેરિકન રાષ્ટ્રપતિ ડોનાલ્ડ ટ્રમ્પ અને રશિયન રાષ્ટ્રપતિ વ્લાદિમીર પુતિને 15 ઑગસ્ટના અલાસ્કામાં રશિયા-યૂક્રેન સંઘર્ષ પર યુદ્ધ વિરામને લઈને ચર્ચા કરી હતી. જો કે, આમાં રશિયન-યૂક્રેન વચ્ચે ચાલતાં યુદ્ધમાં સંઘર્ષ વિરામ લાગુ કરવા પર સંમતિ બની નહીં.
રાષ્ટ્રપતિ પુતિનનો આભાર માનતા, વડા પ્રધાન મોદીએ રશિયા-યુક્રેન સંઘર્ષના શાંતિપૂર્ણ ઉકેલ માટે ભારતના સતત વલણનો પુનરોચ્ચાર કર્યો. રાજદ્વારી અને વાતચીત દ્વારા ઉકેલ લાવવા પર ભાર મૂકતા, તેમણે કહ્યું કે ભારત આ દિશામાં તમામ પ્રયાસોને સમર્થન આપે છે. બંને નેતાઓએ ભારત અને રશિયા વચ્ચે વિશેષ અને વિશેષાધિકૃત વ્યૂહાત્મક ભાગીદારીને વધુ મજબૂત બનાવવા માટે દ્વિપક્ષીય સહયોગના અનેક મુદ્દાઓ પર પણ ચર્ચા કરી.
ADVERTISEMENT
પીએમ મોદીએ X પર લખ્યું, `હું મારા મિત્ર, રાષ્ટ્રપતિ પુતિનનો તેમના ફોન કોલ અને અલાસ્કામાં રાષ્ટ્રપતિ ડોનાલ્ડ ટ્રમ્પ સાથેની તેમની તાજેતરની મુલાકાત વિશે માહિતી શેર કરવા બદલ આભાર માનું છું. ભારતે યુક્રેન વિવાદના શાંતિપૂર્ણ ઉકેલ માટે સતત હાકલ કરી છે અને આ સંદર્ભમાં તમામ પ્રયાસોને સમર્થન આપે છે. હું આગામી દિવસોમાં અમારી વચ્ચે સતત સંપર્કની રાહ જોઉં છું.` તમને જણાવી દઈએ કે યુએસ રાષ્ટ્રપતિ ડોનાલ્ડ ટ્રમ્પે રશિયા પાસેથી તેલ ખરીદવા માટે ભારત પર 50 ટકા ટેરિફ લાદ્યો છે. તેમનું કહેવું છે કે રશિયા પાસેથી તેલ ખરીદીને, ભારત પરોક્ષ રીતે યુક્રેન યુદ્ધને ભંડોળ પૂરું પાડી રહ્યું છે.
ભારતે યુએસ ટૅરિફ સામે સખત વાંધો ઉઠાવ્યો હતો. વિદેશ મંત્રાલયે એક નિવેદનમાં કહ્યું, `તાજેતરના સમયમાં, યુએસે રશિયા પાસેથી ભારતની તેલ આયાતને નિશાન બનાવી છે. અમે આ મુદ્દાઓ પર અમારી સ્થિતિ પહેલાથી જ સ્પષ્ટ કરી દીધી છે. રશિયાથી આપણી તેલ આયાત આંતરરાષ્ટ્રીય બજારની સ્થિતિ પર આધારિત છે અને તેનો ઉદ્દેશ્ય ભારતના 1.4 અબજ લોકો માટે ઉર્જા સુરક્ષા સુનિશ્ચિત કરવાનો છે. તે ખૂબ જ દુર્ભાગ્યપૂર્ણ છે કે અમેરિકાએ ભારત પર વધારાના ટેરિફ લાદવાનો નિર્ણય લીધો છે, જ્યારે ઘણા અન્ય દેશો પણ તેમના રાષ્ટ્રીય હિત માટે રશિયાથી તેલ આયાત કરી રહ્યા છે. અમે પુનરાવર્તન કરીએ છીએ કે આ પગલું અન્યાયી, ખોટું અને વાહિયાત છે. ભારત તેના રાષ્ટ્રીય હિતોનું રક્ષણ કરવા માટે દરેક જરૂરી પગલાં લેશે.`
ભારતે અલાસ્કા બેઠકનું સ્વાગત કર્યું હતું
ભારતે અલાસ્કામાં રશિયન રાષ્ટ્રપતિ વ્લાદિમીર પુતિન અને યુએસ રાષ્ટ્રપતિ ડોનાલ્ડ ટ્રમ્પ વચ્ચેની બેઠકનું સ્વાગત કર્યું હતું અને શાંતિ તરફના તેમના નેતૃત્વને પ્રશંસનીય ગણાવ્યું હતું. અલાસ્કામાં બંને નેતાઓની મુલાકાત પછી, વિદેશ મંત્રાલયે એક નિવેદનમાં કહ્યું હતું કે, `ભારત અલાસ્કા સમિટમાં થયેલી પ્રગતિની પ્રશંસા કરે છે. આગળનો રસ્તો ફક્ત વાતચીત અને રાજદ્વારી દ્વારા જ શોધી શકાય છે. વિશ્વ યુક્રેનમાં સંઘર્ષનો વહેલો અંત જોવા માંગે છે.`
