દિલ્હી-NCRના લોકો ૭ અને ૮ નવેમ્બરે સવારે છથી ૭ વાગ્યા સુધી અને રાત્રે આઠથી ૧૦ વાગ્યા સુધી ગ્રીન ફટાકડા ફોડી શકશે
સુપ્રીમ કોર્ટ
સુપ્રીમ કોર્ટે દિવાળીની ઉજવણી માટે દિલ્હી-NCR (નૅશનલ કૅપિટલ રીજન)માં ગ્રીન ફટાકડા ફોડવા વિશે લેખિત આદેશ જાહેર કર્યો છે. ૭ અને ૮ નવેમ્બરે ગ્રીન ફટાકડાના ઉપયોગની મંજૂરી આપવામાં આવી છે. કોર્ટના આદેશ મુજબ ગ્રીન ફટાકડા સવારે છથી ૭ વાગ્યા સુધી અને રાત્રે આઠથી ૧૦ વાગ્યા સુધી ફોડવાની પરવાનગી રહેશે. સુપ્રીમ કોર્ટે ૮ નવેમ્બરના તહેવાર પહેલાં અગાઉ લગાવવામાં આવેલા પ્રતિબંધોને હંગામી ધોરણે હળવા કર્યા છે. ફટાકડા પર પ્રતિબંધ ફરી ૯ નવેમ્બરથી લાગુ થશે.
જસ્ટિસ એમ. એમ. સુંદરેશ અને જસ્ટિસ પ્રસન્ના બી. વરાલેની બેન્ચે આ આદેશ આપ્યો હતો. કોર્ટે સ્પષ્ટ કર્યું હતું કે હૉસ્પિટલો, નર્સિંગ હોમ, પ્રાથમિક અને જિલ્લા સ્વાસ્થ્ય-કેન્દ્રો, વૃદ્ધાશ્રમો અને સાઇલન્સ ઝોનના ૩૦૦ મીટરના પરિસરમાં ફટાકડા ફોડવાની પરવાનગી નથી. શૈક્ષણિક સંસ્થાઓના વિસ્તારમાં પણ ‘નો ક્રૅકર ઝોન’ જાહેર કરવામાં આવશે. આ માટે યોગ્ય સાઇન બોર્ડ લગાવવામાં આવશે.
ADVERTISEMENT
શું છે ગ્રીન ફટાકડા?
ગ્રીન ફટાકડા સામાન્ય ફટાકડા કરતાં ઓછું પ્રદૂષણ ફેલાવે છે. આ ફટાકડા કાઉન્સિલ ઑફ સાયન્ટિફિક ઍન્ડ ઇન્ડસ્ટ્રિયલ રિસર્ચ (CSIR) અને નૅશનલ એન્વાયર્નમેન્ટલ એન્જિનિયરિંગ રિસર્ચ ઇન્સ્ટિટ્યૂટ (NEERI) દ્વારા વિકસાવવામાં આવ્યા છે. સામાન્ય ફટાકડા કરતાં આ ગ્રીન ફટાકડા ૩૦ ટકા ઓછો ધુમાડો અને પ્રદૂષણ ફેલાવે છે. એમાં બૅરિયમ નાઇટ્રેટ જેવી ઝેરી મેટલનો ઉપયોગ કરવામાં આવતો નથી. એ ઓછો સમય સળગે છે અને રાખ અને ધૂળ પણ ઓછી બને છે. જોકે એનો વધારે ઉપયોગ કરવામાં આવે તો પ્રદૂષણ થાય છે.
