ઘીની મૂર્તિ સાચવવા માટે રોજ ૬૦૦ કિલો બરફનો થઈ રહ્યો છે ઉપયોગ
માતાજીની ઘીની મૂર્તિ
નવરાત્રિનું પર્વ હર્ષોલ્લાસથી ઊજવાઈ રહ્યું છે અને માઈભક્તો શક્તિની ભક્તિ કરી રહ્યા છે ત્યારે અમદાવાદમાં આવેલી ભંડેરીપોળમાં નવરાત્રિના પાવન અવસરે ૧૫૧ કિલો ઘીમાંથી અમદાવાદનાં નગરદેવી ભદ્રકાળી માતાજીની મૂર્તિ બનાવવામાં આવી છે. ઘીની મૂર્તિ શહેરીજનોમાં દર્શનીય બની રહી છે અને માઈભકતો માતાજીનાં દર્શન કરવા ઊમટી રહ્યા છે.
શ્રી વારાહી માતા મિત્ર મંડળના ટ્રસ્ટી ભાર્ગવ શાહે ‘મિડ-ડે’ને કહ્યું હતું કે ‘કાળુપુર વિસ્તારમાં આવેલી ભંડેરી પોળમાં શ્રી વારાહી માતાજીનું મંદિર આવેલું છે જ્યાં છેલ્લાં ૩૪ વર્ષથી નવરાત્રિમાં વિવિધ સ્વરૂપે માતાજીની ઘીમાંથી મૂર્તિ બનાવીએ છીએ. આ વખતે નગરદેવી ભદ્રકાળી માતાજીની ૧૫૧ કિલો ઘીની મૂર્તિ બનાવી છે. મૂર્તિ બનાવવામાં ઑર્ગેનિક કલરનો ઉપયોગ કર્યો છે તેમ જ આભૂષણોથી મૂર્તિને સુશોભિત કરવામાં આવી છે. ઘીમાંથી મૂર્તિ બનાવી હોવાથી એને સાચવવા માટે રોજ આશરે ૬૦૦ કિલો બરફનો ઉપયોગ કરીએ છીએ. આ ઉપરાંત પંડાલમાં વાતાવરણ જણવાઈ રહે એ માટે થર્મોકૉલમાંથી સ્ટેજ બનાવ્યું છે. આ મૂર્તિ બનાવવા પાછળ ૩૬ કલાક જેટલો સમય લાગ્યો હતો. આણંદ પાસે આવેલા મોરગી ગામના ગોપાલ તડવીએ માતાજીની મૂર્તિ બનાવી છે. ઘીમાંથી બનેલી માતાજીની મૂર્તિનાં દર્શન સવારે ૯થી ૧૨ વાગ્યા સુધી અને સાંજે પાંચથી રાતે ૧૨ વાગ્યા સુધી દર્શનાર્થીઓ કરી શકે છે.’
