હવે મુંબઈના આ મંદિરને મળી બૉમ્બથી ઉડાડી દેવાની ધમકી, પોલીસ અને બૉમ્બ સ્કવૉડ દોડતી થઈ

ISKCON Temple Girgaon receives bomb threat: ગિરગાંવ વિસ્તારમાં આવેલા ઇસ્કોન મંદિરને બૉમ્બથી ઉડાડી દેવાની ધમકી મળી; ઈ-મેલમાં મળી હતી ધમકી

પ્રતીકાત્મક ફાઇલ તસવીર

મુંબઈ (Mumbai)ને મળતી બૉમ્બની ધમકીઓમાં દિવસે-દિવસે વધારો થઈ રહ્યો છે. આજે ફરી એક મંદિરને બૉમ્બથી ઉડાડી દેવાની ધમકી (Bomb Threat) મળી છે. હવે ગિરગામ (Girgaon)ના ઇસ્કોન મંદિર (ISKCON Temple)ને બૉમ્બથી ઉડાડી દેવાની ધમકી ભર્યો ઈ-મેલ મળ્યો છે. ધમકી મળતાં જ મુંબઈ પોલીસ (Mumbai Police) અને બૉમ્બ સ્કવૉડ (Bomb Squad)એ તાત્કાલિક તપાસ હાથ ધરી હતી. સદ્નસીબે, કઈ શંકાસ્પદ મળ્યું ન હતું.

મુંબઈના ગિરગાંવ વિસ્તારમાં આવેલા ઇસ્કોન મંદિરના સત્તાવાર આઈડી પર એક ધમકીભર્યો ઈ-મેલ (ISKCON Temple Girgaon receives bomb threat) મળ્યો હતો. આ માહિતી તાત્કાલિક નજીકના પોલીસ સ્ટેશન અને બૉમ્બ ડિટેક્શન એન્ડ ડિસ્પોઝલ સ્ક્વૉડ (Bomb Detection and Disposal Squad) સાથે શેર કરવામાં આવી હતી. આ ઘટના આજે એટલે કે, શુક્રવારે સવારે બની હતી. પોલીસ અધિકારીઓએ તાત્કાલિક બૉમ્બ સ્ક્વોડને જાણ કરી હતી, અને મંદિર પરિસરની વિગતવાર તપાસ હાથ ધરવામાં આવી હતી. અધિકારીઓએ સમગ્ર વિસ્તારનું નિરીક્ષણ કર્યું હતું પરંતુ કામગીરી દરમિયાન કંઈપણ શંકાસ્પદ મળ્યું ન હતું.

ADVERTISEMENT

આ મામલો હવે ગામદેવી પોલીસ સ્ટેશન (Gamdevi Police Station) દ્વારા હાથ ધરવામાં આવ્યો છે. ગામદેવી પોલીસ સ્ટેશન દ્વારા ધમકીભર્યા ઈ-મેલના સ્ત્રોતની વધુ તપાસ કરવામાં આવી છે. તપાસ ચાલુ હોવાથી મંદિર અને તેની આસપાસ સુરક્ષા વધારી દેવામાં આવી છે.

સૂત્રોના જણાવ્યા અનુસાર, આ ઈ-મેલ ઇસ્કોન મંદિરની વ્યવસ્થાપન સમિતિના સત્તાવાર ઈ-મેલ પર મોકલવામાં આવ્યો હતો. ધમકીભર્યો ઈ-મેલ ઇમેન્યુઅલ સેકરન નામના એકાઉન્ટ પરથી આવ્યો હોવાનું કહેવાય છે. આ મામલે વધુ તપાસ ચાલી રહી છે.

નોંધનીય છે કે, ઇસ્કોન મંદિરને ત્રીજીવાર બૉમ્બથી ઉડાડી દેવાની ધમકી મળી છે.

ગુરુવારે મુંબઈની ફાઇવ સ્ટાર હોટેલને મળી હતી બૉમ્બથી ઉડાડી દેવાની ધમકી

ગુરવારે ૨૧ ઓગસ્ટે વરલી (Worli)માં આવેલી ફોર સીઝન્સ હોટેલ (Four Seasons Hotel)ને બૉમ્બથી ઉડાડી દેવાની ધમકી આપતો ઈ-મેલ મળ્યો હતો. ત્યારબાદ હોટેલની સુરક્ષા વધારવામાં આવી હતી અને મુંબઈ પોલીસ (Mumbai Police)એ તાત્કાલિક તપાસ હાથ ધરી હતી. ફોર સીઝન્સ હોટેલને સંબોધિત ધમકીભર્યો ઈ-મેલ મળ્યો હતો, તેમાં ત્રણ VIP રૂમને નિશાન બનાવીને વિસ્ફોટ થવાની ચેતવણી આપવામાં આવી હતી. પોલીસ સૂત્રોના જણાવ્યા અનુસાર, ઈ-મેલમાં ભૂતકાળની ઘટનાઓનો પણ ઉલ્લેખ કરવામાં આવ્યો હતો અને મહેમાનોને બહાર કાઢવાનો ઉલ્લેખ કરવામાં આવ્યો હતો. ઈ-મેલ મોકલનાર વ્યક્તિએ તમિલનાડુ (Tamil Nadu) પોલીસ પાસે યુનિયન બનાવવાની પરવાનગી માંગી હતી. આ ઈ-મેલ બાદ, સાયબર પોલીસ (Cyber Police)એ ઇ-મેલના મૂળ સ્થાનને શોધવા અને મોકલનારને ઓળખવા માટે તપાસ શરૂ કરી હતી. જોકે, હોટેલમાં પણ કંઈ શંકાસ્પદ નહોતું મળ્યું.

મુંબઈ પોલીસે વધારી સુરક્ષા

કોલ અને ઈ-મેલ બંને દ્વારા એક પછી એક બૉમ્બની ધમકીઓ મળતી હોવાથી, મુંબઈ પોલીસે સંવેદનશીલ વિસ્તારોમાં દેખરેખ વધારી દીધી છે. સાયબર પોલીસ (Mumbai Cyber Police) ટીમો હવે નવીનતમ ઇ-મેલ મોકલનારને શોધવા પર ધ્યાન કેન્દ્રિત કરી રહી છે.