રજિસ્ટ્રેશન માટે વકીલના ડ્રેસમાં પહોંચ્યાં હતાં બન્ને કોર્ટ-પરિસરમાં: જોરદાર હોબાળો થતાં પોલીસ આવી પહોંચી અને લઈ ગઈ કપલને
પ્રતીકાત્મક તસવીર
ગુજરાતમાં બનતી લવ જેહાદની ઘટનાઓના પગલે હાલમાં જ ગુજરાત સરકારે લગ્ન-નોંધણી પ્રક્રિયામાં સુધારો કરવા માટે પ્રક્રિયા હાથ ધરી છે ત્યારે ગઈ કાલે અમદાવાદના કોર્ટ-પરિસરમાં આવેલી જિલ્લા રજિસ્ટ્રારની લગ્ન-નોંધણી ઑફિસમાં હિન્દુ યુવતી અને મુસ્લિમ યુવકનાં લગ્નના રજિસ્ટ્રેશનને લઈને વિવાદ થયો હતો. હિન્દુ સંગઠને કોર્ટ-પરિસરમાં પહોંચીને વિરોધ કર્યો હતો. વિવાદ વકરતાં પોલીસ કોર્ટ-પરિસરમાં પહોંચી ગઈ હતી અને યુવક-યુવતીને લઈ ગઈ હતી.
એક યુવતી અને એક યુવાન અમદાવાદમાં લગ્ન-રજિસ્ટ્રેશન માટે આવ્યાં હતાં. જોકે તેઓ અમદાવાદનાં નહોતાં. લગ્ન-રજિસ્ટ્રેશન માટે તેઓ વકીલના ડ્રેસમાં પહોંચતાં વિવાદ થયો હતો. આ ઘટનાની જાણ હિન્દુ સંગઠનને થતાં તેમણે કોર્ટ-પરિસરમાં પહોંચીને વિરોધ કર્યો હતો. વિરોધ વધતાં પોલીસ આવી પહોંચી હતી. પોલીસ યુવક અને યુવતીને તેમના ગાંધીનગર જિલ્લામાં લઈ ગઈ હતી એટલું જ નહીં, અમદાવાદમાં આવેલા દરિયાપુર વિધાનસભા મતવિસ્તારના BJPના વિધાનસભ્ય કૌશિક જૈન પણ કોર્ટમાં પહોંચ્યા હતા. કૌશિક જૈને મીડિયાને કહ્યું હતું કે ‘તે લોકો લગ્ન-રજિસ્ટ્રેશન કરાવવા આવ્યાં હતાં. મેં પોલીસ-કમિશનરને ભલામણ કરી હતી કે છોકરી દહેગામની હોય તો તેને દહેગામ લઈ જઈ તેનાં મમ્મી-પપ્પાને એક વાર મળાવીને જે નિર્ણય લેવાય એ પ્રમાણે કરો. યુવક-યુવતી પોતાના લગ્નનું રજિસ્ટ્રેશન કરાવવા માટે આવ્યાં હતાં, પરંતુ રજિસ્ટ્રેશન થયું નથી. આ લોકો વકીલના ડ્રેસમાં આવ્યાં હતાં. પોલીસ તેમને લઈ ગઈ છે.’
