એક સમયે NSDમાં સમોસા વેચતો હતો ‘કિંગ ખાન’, આ દિગ્ગજ અભિનેતાએ કર્યો ખુલાસો

Shah Rukh Khan childhood: નવી દિલ્હીમાં નેશનલ સ્કૂલ ઓફ ડ્રામામાં ભણતા શાહરૂખ ખાન સાથે જોડાયેલો એક રસપ્રદ કિસ્સો શેર કર્યો પીઢ અભિનેતા પંકજ કપૂરે; કિંગ ખાન એક સમયે એનએસડીમાં સમોસા સપ્લાય કરવાનું કામ કરતો હતો

શાહરૂખ ખાન સાથે જોડાયેલો એક રસપ્રદ કિસ્સો શેર કર્યો પીઢ અભિનેતા પંકજ કપૂરે

દિલ્હી (Delhi)ના થિયેટરમાંથી નીકળીને ભારતીય સિનેમાના સૌથી મોટા સુપરસ્ટાર બનવા સુધીની શાહરૂખ ખાન (Shah Rukh Khan)ની સફર હંમેશા પ્રેરણાદાયી રહી છે. બ્લોકબસ્ટર ફિલ્મો આપવા અને બોક્સ ઓફિસ પર રાજ કરીને વૈશ્વિક સ્તરે નામ કમાવ્યાના ઘણા સમય પહેલાં, શાહરૂખ દેશના કેટલાક શ્રેષ્ઠ કલાકારોની વચ્ચે ઉછરી રહ્યો હતો. તાજેતરમાં જ પીઢ અભિનેતા પંકજ કપૂર (Pankaj Kapur)એ શાહરૂખના બાળપણની એક યાદ શેર કરી છે, જે સુપરસ્ટારને દિલ્હીની નેશનલ સ્કૂલ ઓફ ડ્રામા (National School of Drama) સાથે જોડે છે.

પંકજ કપૂર, NSD અને શાહરુખનું કનેક્શન

ADVERTISEMENT

`કિન્ડલ કાસ્ટ` ની યુટ્યુબ ચેનલ પર તાજેતરમાં આપેલા એક ઇન્ટરવ્યુમાં, પંકજ કપૂરે ૧૯૭૦ના દાયકાના મધ્યમાં નેશનલ સ્કૂલ ઓફ ડ્રામા (NSD)માં પોતાના વિદ્યાર્થીકાળના દિવસો યાદ કર્યા હતા. તે દિવસો વિશે વાત કરતાં તેમણે ખુલાસો કર્યો હતો કે એક નાનો શાહરૂખ ખાન અવારનવાર NSDની કેન્ટીનમાં (Shah Rukh Khan childhood) જોવા મળતો હતો અને નાટકના ઇન્ટરવલ દરમિયાન થિયેટર કલાકારોને નાસ્તો પીરસવામાં મદદ કરતો હતો.

પંકજ કપૂરે જણાવ્યું હતું કે, ‘તે સમયે જે સમોસા આપવામાં આવતા હતા, તે બીજું કોઈ નહીં પણ શાહરૂખ ખાન લાવતો હતો. તે સમયે તે માત્ર ૧૦ વર્ષનો નાનો છોકરો હતો.’

પંકજ કપૂરે NSD કેન્ટીનમાં ૧૦ વર્ષના શાહરૂખ ખાનને યાદ કર્યો

પંકજ કપૂરે શાહરૂખ ખાનને બોલિવૂડનો જાણીતો ચહેરો બનવાના ઘણા સમય પહેલાં NSDની કેન્ટીનમાં એક બાળક તરીકે જોયો હતો. પીઢ અભિનેતાએ જણાવ્યું કે તે સમયે શાહરૂખના પિતા અથવા કાકા તે કેન્ટીન સાથે જોડાયેલા હતા.

વર્ષો પછી જ્યારે પંકજ કપૂરે રાજીવ મેહરાની ૧૯૯૫ની એક્શન થ્રિલર ફિલ્મ `રામ જાને`માં શાહરૂખ ખાન સાથે કામ કર્યું, ત્યારે આ યાદ વધુ રસપ્રદ બની ગઈ હતી. અલબત્ત, તે સમયે પંકજ કપૂરને અંદાજ પણ નહોતો કે NSDમાં જોવા મળતો આ નાનો છોકરો ભવિષ્યમાં હિન્દી સિનેમાનો મુખ્ય કલાકાર બની જશે. આ કિસ્સો શાહરૂખના દિલ્હીના થિયેટર જગત સાથેના જૂના અને ગાઢ સંબંધોને વધુ ઉજાગર કરે છે.

શાહરૂખ ખાનનો NSD સાથેનો ઊંડો સંબંધ

શાહરૂખ ખાનના પિતા મીર તાજ મોહમ્મદ ખાન દિલ્હીમાં રેસ્ટોરન્ટ વ્યવસાય સાથે જોડાયેલા હતા અને સફદરજંગમાં `ખાતિર` નામની જાણીતી આઉટલેટ ધરાવતા હતા. ૧૯૮૧માં તેમના અવસાન બાદ, શાહરૂખના માતા લતીફ ફાતિમા ખાને ૧૯૯૦માં તેમના મૃત્યુ સુધી આ રેસ્ટોરન્ટ ચલાવી હતી. `ખાતિર` તેમનો મુખ્ય કૌટુંબિક વ્યવસાય હોવા છતાં, શાહરૂખે અગાઉ ખુલાસો કર્યો હતો કે તેના પિતા NSDની મેસ (કેન્ટીન) ચલાવવામાં પણ ઘણો સમય વિતાવતા હતા.

શાળાના દિવસોમાં, શાહરૂખ ક્લાસ પૂરા થયા પછી NSD જતો અને ત્યાં તેની બહેન શહેનાઝ લાલારુખ ખાનની દરરોજ લગભગ બે કલાક સુધી રાહ જોતો, જેથી બંને સાથે ઘરે જઈ શકે. આ કલાકો દરમિયાન તે કલાકારો, રિહર્સલ, નાટકો અને ચર્ચાઓથી ઘેરાયેલો રહેતો, જેણે ક્યાંક ને ક્યાંક તેની કલ્પનાશક્તિને આકાર આપ્યો હતો.

વર્ષ ૨૦૧૪માં ટાઇમ્સ ઓફ ઇન્ડિયાને આપેલા એક ઇન્ટરવ્યુમાં શાહરૂખે કહ્યું હતું કે, ‘હું ખૂબ જ ક્યૂટ બાળક હતો અને મારું આખું બાળપણ ત્યાં ભારતના સર્વશ્રેષ્ઠ કલાકારોના ખોળામાં અને તેમની આસપાસ ફરવામાં વીત્યું હતું.’

આ ‘સર્વશ્રેષ્ઠ કલાકારો’માં ભારતીય સિનેમા અને થિયેટરના કેટલાક સૌથી આદરણીય નામો સામેલ હતા. ૧૯૭૬માં NSDમાંથી ગ્રેજ્યુએટ થયેલા પંકજ કપૂર પણ તેમાંના એક હતા. તેમના બેચમેટર રઘુબીર યાદવ, સિનિયર્સ રાજ બબ્બર, નાદિરા બબ્બર, નસીરુદ્દીન શાહ, રોહિણી હટ્ટંગડી અને પાછળથી જુનિયર બનેલા અનુપમ ખેર જેવા કલાકારો એ માહોલનો ભાગ હતા, જેમને શાહરૂખ ખૂબ નજીકથી જોતો હતો. તેમાંના ઘણા કલાકારોએ પાછળથી ફિલ્મોમાં તેની સાથે સ્ક્રીન શેર કરી હતી.

NSD કેન્ટીનથી બોલિવૂડ સ્ટારડમ સુધી

પંકજ કપૂરની આ યાદ માત્ર એક સુંદર ભૂતકાળ નથી, પરંતુ તે સ્ટારડમની સફરની સાચી વાર્તા દર્શાવે છે. ફિલ્મના સેટ, વિદેશી કોન્સર્ટ અને વૈશ્વિક લોકપ્રિયતા પહેલાં, એક એવો છોકરો હતો જે થિયેટરના કોરિડોરમાં રાહ જોતો હતો અને કલાકારોને રિહર્સલ કરતા જોઈને અજાણતા જ અભિનયની કળા શીખી રહ્યો હતો.

નોંધનીય છે કે, શાહરૂખ ખાનની કારકિર્દી ત્રણ વર્ષ પહેલાં વધુ એક ઐતિહાસિક ઊંચાઈએ પહોંચી જ્યારે તેની ફિલ્મો `પઠાન` અને `જવાન` દેશ અને વિદેશમાં સુપરહિટ સાબિત થઈ. દાયકાઓના સુપરસ્ટારડમ છતાં, અભિનેતાના દિલ્હીના મૂળ અને થિયેટર કનેક્શન તેની વાર્તાનો એક અભિન્ન ભાગ રહ્યા છે. પંકજ કપૂરની આ યાદ અપાવે છે કે કેમેરાની સામે આવ્યાના ઘણા સમય પહેલાં જ શાહરૂખનો અભિનય સાથેનો સંબંધ શરૂ થઈ ચૂક્યો હતો.