ચૅમ્પિયન્સ લીગના ગ્રુપ ‘એ’ની ઍજેક્સની સૌથી ખરાબ હાર, નૅપોલીની સતત ત્રીજી જીત
UEFA Champions League
ઍમ્સ્ટરડૅમમાં મંગળવારે ઍજેક્સનો નાઇજિરિયન ડિફેન્ડર કૅલ્વિન બૅસી (વચ્ચે) બૉલ પોતાના કબજામાં કરી રહ્યો હતો ત્યારે તેની સાથેની ટક્કરમાં નૅપોલીનો હિર્વિંગ લૉઝાનો નીચે પટકાયો હતો. તસવીર એ.એફ.પી.
ચૅમ્પિયન્સ લીગ ફુટબૉલ સ્પર્ધામાં ઇટલીની નૅપોલી ક્લબની ટીમે મંગળવારે નેધરલૅન્ડ્સના ઍમ્સ્ટરડૅમમાં ઍજેક્સને યુરોપિયન ફુટબૉલમાં એની સૌથી ખરાબ હારનો અનુભવ કરાવ્યો હતો. નૅપોલીએ ઍજેક્સને ૬-૧થી હરાવીને ચૅમ્પિયન્સ લીગમાં સનસનાટીભરી શરૂઆત જાળવી રાખી હતી.
મૅચના કુલ સાતમાંથી પહેલો ગોલ ઍજેક્સે ૯મી મિનિટમાં કર્યો હતો. મોહમ્મદ કુડુસના એ ગોલ બાદ ૧૮મી મિનિટથી ખરાખરીનો ખેલ શરૂ થયો હતો. ૧૮મી મિનિટમાં રસ્પૅડોરીએ નૅપોલીને પહેલો ગોલ અપાવ્યો અને પછી નૅપોલીને લાઇનબંધ ગોલ મળવા લાગ્યા હતા. ૩૩મી મિનિટમાં ડિ લૉરેન્ઝોએ, ૪૭મી મિનિટમાં ફરી રસ્પૅડોરીએ, ૪૫મી મિનિટમાં ઝીલિન્સ્કીએ, ૬૩મી મિનિટમાં ક્વારૅટ્સખેલિયાએ અને ૮૧મી મિનિટમાં સિમીઑને ગોલ કર્યો હતો. હાફ ટાઇમ વખતે સ્કોર ૩-૧ હતો. ૧-૬ની હાર ઍજેક્સની વર્ષ ૧૯૬૪ પછીની સૌથી કારમી હાર છે.
ADVERTISEMENT
યુક્રેનને ફુટબૉલ વર્લ્ડ કપ રાખવો છે
૨૦૧૨માં યુક્રેને યુરોપિયન ફુટબૉલ ચૅમ્પિયનશિપનું સંયુક્ત રીતે આયોજન કર્યું હતું, પરંતુ છેલ્લા એક વર્ષથી રશિયા સાથેના યુદ્ધને કારણે યુક્રેન પાયમાલ થઈ ગયું છે. જોકે દેશની જનતામાં જે દમદાર સૉકરક્રેઝ જળવાઈ રહ્યો છે એનાથી પ્રેરાઈને યુક્રેનની સરકારે વર્ષ ૨૦૩૦ના ફિફા ફુટબૉલ વર્લ્ડ કપનું સંયુક્ત યજમાન બનવાનો દાવો કર્યો છે. સ્પેન અને પોર્ટુગલની સાથે યુક્રેન પણ યજમાન બનવા જોડાઈ રહ્યું છે.