વ્યક્તિગત નિષ્ફળતાથી એશિયન ગેમ્સના સુવર્ણ શિખર સુધી: સુરૂચિ સિંહ અને કમલજીતે રચ્યો નવો ઇતિહાસ

Asian Games 2026: નિશાનેબાજ સુરૂચિ સિંહ અને કમલજીતે નવો એશિયન રેકોર્ડ સર્જી ભારત માટે બીજો ગોલ્ડ મેડલ જીત્યો; જાણો કોણ છે ભારતને સુવર્ણ ચંદ્રક અપાવનાર સુરૂચિ સિંહ અને કમલજીત

જાપાનના નાગોયામાં ચાલી રહેલી એશિયન ગેમ્સ 2026 દરમિયાન, શુક્રવાર, 25 સપ્ટેમ્બર 2026ના રોજ 10 મીટર એર પિસ્તોલ મિક્સ્ડ ટીમ ફાઇનલમાં સુવર્ણ ચંદ્રક જીત્યા બાદ ભારતના કમલજીત (ડાબે) અને સુરુચિ સિંહ (તસવીર સૌજન્યઃ પીટીઆઇ)

વ્યક્તિગત સ્પર્ધાઓની નિષ્ફળતામાંથી બહાર આવીને આઈચી-નાગોયા (Aichi-Nagoya) ખાતે એશિયન ગેમ્સના (Asian Games 2026) વિજેતા મંચ પર સાથે ઊભા રહીને સુરૂચિ સિંહ (Suruchi Singh) અને કમલજીત (Kamaljeet)એ ભારતીય શૂટિંગ માટે એક અદ્ભુત વાપસીની વાર્તા લખી છે. મહિલાઓની ૧૦ મીટર એર પિસ્તોલ ક્વોલિફિકેશનમાં સુરૂચિના નિરાશાજનક પ્રદર્શન અને પુરુષોની ફાઇનલમાં પહોંચવાથી કમલજીતના માત્ર એક પોઇન્ટથી ચૂકી ગયા બાદ, આ જોડીએ મિક્સ ટીમ ઇવેન્ટમાં નવા ઉત્સાહ અને સંકલ્પ સાથે મેદાનમાં વાપસી કરી હતી. અચૂક નિશાન અને અદ્ભુત ધૈર્યના બળ પર રેકોર્ડબ્રેક પ્રદર્શન કરીને બંને શૂટર્સે ભારતને ગોલ્ડ મેડલ અપાવ્યો હતો.

ભારતીય નિશાનેબાજ સુરૂચિ સિંહ અને કમલજીતે શુક્રવારે આઈચી જનરલ શૂટિંગ રેન્જ ખાતે શાનદાર પ્રદર્શન કરતાં એશિયન ગેમ્સ ૨૦૨૬માં ૧૦ મીટર એર પિસ્તોલ મિક્સ ટીમ સ્પર્ધામાં ગોલ્ડ મેડલ પોતાના નામે કર્યો છે. ભારતીય જોડીએ ફાઇનલમાં ૪૮૪.૬ પોઇન્ટ મેળવીને નવો એશિયન રેકોર્ડ સર્જ્યો હતો. મહિલા ક્રિકેટ ટીમની ઐતિહાસિક જીત બાદ ચાલુ એશિયન ગેમ્સમાં ભારતનો આ બીજો ગોલ્ડ મેડલ છે.

ADVERTISEMENT

એશિયન રેકોર્ડ તોડીને મેળવી ભવ્ય જીત

સુરૂચિ અને કમલજીતે ફાઇનલ મેચ દરમિયાન શરૂઆતથી જ લીડ જાળવી રાખી હતી. તેમના ૪૮૪.૬ પોઇન્ટના ફાઇનલ સ્કોરે ઉઝબેકિસ્તાન દ્વારા બનાવવામાં આવેલા ૪૮૧.૩ પોઇન્ટના અગાઉના એશિયન રેકોર્ડને આસાનીથી માત આપી હતી. દક્ષિણ કોરિયાના સુહ્યોન હોંગ અને ગાઓન ચૂ (૪૭૮.૦ પોઇન્ટ)ને સિલ્વર મેડલથી સંતોષ માનવો પડ્યો હતો, જ્યારે ઈરાને ૪૧૫.૮ પોઇન્ટ સાથે બ્રોન્ઝ મેડલ જીત્યો હતો.

ભારતીય જોડીએ પ્રથમ સિરીઝમાં ૧૦૩.૦ સ્કોર કરીને પોતાની પકડ મજબૂત કરી લીધી હતી. સામાન્ય રીતે પોઈન્ટના મામૂલી તફાવતથી નિર્ણાયક બનતી આ સ્પર્ધામાં ભારતીય શૂટર્સે મોટા માર્જિનથી જીત મેળવીને પોતાનું વર્ચસ્વ સાબિત કર્યું હતું.

વ્યક્તિત્વ સ્પર્ધાની નિષ્ફળતા બાદ મેળવી શાનદાર વાપસી

બંને શૂટર્સ માટે આ ગોલ્ડ મેડલ વ્યક્તિગત સ્પર્ધાઓની નિષ્ફળતા બાદ અદ્ભુત વાપસી સમાન છે. કમલજીત પુરુષોની ૧૦ મીટર એર પિસ્તોલની ફાઇનલમાં ક્વોલિફાય થવાથી માત્ર એક પોઇન્ટ દૂર રહી ગયો હતો અને નવમા સ્થાને રહ્યો હતો. જ્યારે હરિયાણાની ૧૯ વર્ષીય ઉભરતી ખેલાડી સુરૂચિ મહિલાઓની વ્યક્તિગત ક્વોલિફિકેશનમાં ૨૬મા ક્રમે રહી હતી.

જોકે, મિક્સ ટીમ ઇવેન્ટમાં દમદાર વાપસી કરતાં આ જોડીએ ક્વોલિફાઇંગ રાઉન્ડમાં ૫૮૭ સ્કોર (૨૯ ઇનર-૧૦s સાથે) મેળવીને પ્રથમ સ્થાન સાથે મેડલ રાઉન્ડમાં પ્રવેશ કર્યો હતો.

કોણ છે સુરૂચિ સિંહ?

૨૮ એપ્રિલ ૨૦૦૬ના રોજ જન્મેલી સુરૂચિ સિંહ મૂળ હરિયાણાના ઝજ્જરની વતની છે અને ત્યાં જ તેનો ટ્રેનિંગ બેઝ છે. રમતગમતની મજબૂત પારિવારિક પૃષ્ઠભૂમિ હોવાને કારણે શરૂઆતમાં તેને કુશ્તી ક્ષેત્રે આગળ વધવા માટે પ્રોત્સાહિત કરવામાં આવી હતી. જોકે, માત્ર ૧૩ વર્ષની ઉંમરે તેણે શૂટિંગની પસંદગી કરી અને ભિવાનીની ગુરુ દ્રોણાચાર્ય શૂટિંગ એકેડમીમાં કોચ સુરેશ સિંહના માર્ગદર્શન હેઠળ તાલીમ શરૂ કરી.

વર્લ્ડ કપમાં હેટ્રિક ગોલ્ડ (૨૦૨૫): સુરૂચિએ બ્યુનોસ આયર્સ, લીમા અને મ્યુનિકમાં સતત ત્રણ ISSF વર્લ્ડ કપમાં ગોલ્ડ મેડલ જીતીને સીનિયર ઈન્ટરનેશનલ સર્કિટ પર ધમાકેદાર પ્રવેશ કર્યો હતો. લીમા વર્લ્ડ કપમાં તેણે સૌરભ ચૌધરી સાથે મિક્સ ટીમમાં પણ ગોલ્ડ જીત્યો હતો.

જ્યુનિયર વર્લ્ડ રેકોર્ડ: ૨૦૨૫માં દોહા ખાતે યોજાયેલા ISSF વર્લ્ડ કપ ફાઇનલમાં ૧૦ મીટર એર પિસ્તોલ સ્પર્ધામાં ૨૪૫.૧ સ્કોર સાથે ગોલ્ડ જીતીને નવો જ્યુનિયર વર્લ્ડ રેકોર્ડ બનાવ્યો હતો.

૨૦૨૬માં સતત સફળતા: ૨૦૨૬માં તેણે મ્યુનિક વર્લ્ડ કપમાં ફરી ગોલ્ડ મેળવ્યો, તેમજ નવી દિલ્હી ખાતે યોજાયેલી એશિયન શૂટિંગ ચેમ્પિયનશિપમાં સમ્રાટ રાણા સાથે સિલ્વર મેડલ મેળવ્યો હતો.

કોણ છે શૂટર કમલજીત?

૨૨ ઓગસ્ટ ૨૦૦૩ના રોજ જન્મેલો કમલજીત હરિયાણાના રેવાડી જિલ્લાના સુલખા ગામનો વતની છે. તે ૧૦ મીટર એર પિસ્તોલની સાથે ૫૦ મીટર પિસ્તોલમાં પણ નિશાનો સાધે છે. તેનો ટ્રેનિંગ બેઝ સુલખા સ્થિત ‘10X શૂટિંગ એકેડમી’ છે.

કમલજીતે ૨૦૧૯માં શૂટિંગની શરૂઆત કરી હતી. આ અગાઉ તે ટ્રેક એન્ડ ફીલ્ડ એથ્લેટિક્સમાં હતો, પરંતુ ઈજાના કારણે તેણે તે કરિયર છોડવી પડી હતી. મધ્યમ વર્ગીય પરિવારમાંથી આવતા કમલજીત સામે શરૂઆતમાં આર્થિક પડકારો હતા, જેના કારણે તેણે એક તબક્કે રમત છોડવાનો વિચાર કર્યો હતો. પરંતુ માતા-પિતાના સતત સહયોગ અને પોતાની ૨-૩ વર્ષની સખત મહેનતના બળે તેણે આંતરરાષ્ટ્રીય સ્તરે સ્થાન બનાવ્યું.

જ્યુનિયર વર્લ્ડ ચેમ્પિયન (૨૦૨૩): ચાંગવોનમાં યોજાયેલી ISSF જ્યુનિયર વર્લ્ડ ચેમ્પિયનશિપમાં ૫૦ મીટર પિસ્તોલ જ્યુનિયર પુરુષ વ્યક્તિત્વ સ્પર્ધામાં (૫૪૪ સ્કોર સાથે) ગોલ્ડ તેમજ ટીમ સ્પર્ધામાં પણ ગોલ્ડ જીત્યો હતો.

વર્લ્ડ ચેમ્પિયનશિપ મેડલ્સ: ૨૦૨૩માં બાકુ ખાતે યોજાયેલી ૫૩મી ISSF વર્લ્ડ ચેમ્પિયનશિપમાં પુરુષ ૫૦ મીટર પિસ્તોલ ટીમમાં બ્રોન્ઝ અને ૨૦૨૫માં કાહિરા ખાતેની વર્લ્ડ ચેમ્પિયનશિપમાં સિલ્વર મેડલ મેળવ્યો હતો.

એશિયન ચેમ્પિયનશિપ (૨૦૨૬): ૨૦૨૬માં નવી દિલ્હી એશિયન ચેમ્પિયનશિપમાં ૫૦ મીટર પિસ્તોલ વ્યક્તિત્વ ઇવેન્ટમાં ૫૬૧ સ્કોર સાથે સિલ્વર મેડલ જીત્યો હતો.

ભારતનો કુલ મેડલ આંક ૧૯ પર પહોંચ્યો

સુરૂચિ અને કમલજીત બંને જુનિયર સ્તરથી આંતરરાષ્ટ્રીય સ્તર સુધી ઝડપથી પોતાની ઓળખ બનાવી રહ્યા છે. સુરૂચિએ અગાઉ ISSF જુનિયર વર્લ્ડ કપમાં શ્રેષ્ઠ પ્રદર્શન કર્યું હતું, જ્યારે કમલજીતે ઘરઆંગણાની ટ્રાયલ્સમાં શાનદાર રમત દાખવી છે. આઈચી-નાગોયા ખાતે તેમનો આ ગોલ્ડ મેડલ ભારતીય શૂટિંગ ક્ષેત્રે એક મોટો સીમાચિહ્નરૂપ છે.

આ જીત સાથે જ ૨૦૨૬ની એશિયન ગેમ્સમાં ભારતનો કુલ મેડલ આંક ૧૯ પર પહોંચી ગયો છે, જેમાં ૨ ગોલ્ડ, ૮ સિલ્વર અને ૯ બ્રોન્ઝ મેડલનો સમાવેશ થાય છે. રાષ્ટ્રીય શૂટિંગ કોચોએ દબાણ હેઠળ આ જોડીએ દર્શાવેલી ક્ષમતાના વખાણ કર્યા હતા.