આજે કૅરિબિયન ટીમ પર ક્લીન સ્વીપનો ખતરો

ભારત-વેસ્ટ ઇન્ડીઝ વચ્ચે છેલ્લી અને ત્રીજી વન-ડે આજે મુલ્લાંપુરમાં

શુભમન ગિલ

આજે ન્યુ ચંડીગઢમાં મુલ્લાંપુરમાં મહારાજા યાદવિન્દ્ર સિંહ ઇન્ટરનૅશનલ ક્રિકેટ સ્ટેડિયમની પહેલવહેલી મેન્સ વન-ડે મૅચ રમાશે. અહીં સપ્ટેમ્બર ૨૦૨૫માં ભારત અને ઑસ્ટ્રેલિયાની મહિલાઓની બે મૅચ રૂપે જ વન-ડે ઇન્ટરનૅશનલ મૅચ રમાઈ હતી. 
મુલ્લાંપુરમાં ભારતીય મેન્સ ટીમ ડિસેમ્બર ૨૦૨૫માં સાઉથ આફ્રિકા સામે એક T20 મૅચ અને જૂન ૨૦૨૬માં અફઘાનિસ્તાન સામે એક ટેસ્ટ-મૅચ રમી છે. T20 મૅચમાં ૫૧ રને હાર જ્યારે ટેસ્ટ-મૅચમાં એક ઇનિંગ્સ અને ૩૦૦ રનથી જીત મળી હતી. 
વેસ્ટ ઇન્ડીઝ સામે લાગલગાટ ૧૪મી વન-ડે સિરીઝ જીતનાર ભારતની નજર હવે ત્રીજી વન-ડે મૅચ દરમ્યાન ક્લીન સ્વીપ પર રહેશે. ભારતનું નિર્ણાયક બોલિંગ-આક્રમણ વધુ સારા પ્રદર્શન પર નજર રાખશે. છેલ્લી બે મૅચોમાં બેન્ચ પર જ બેસનાર મોહમ્મદ સિરાજને ઇન્જર્ડ પ્રસિદ્ધ ક્રિષ્નાને સ્થાને પ્લેઇંગ ઇલેવનમાં સામેલ કરવામાં આવશે કે નહીં એ જોવું રસપ્રદ રહેશે.

પહેલી બે વન-ડે મૅચમાં રેકૉર્ડ ૮ સદી 

ADVERTISEMENT

ત્રણ વન-ડે સિરીઝની પહેલી બે મૅચમાં જ ભારત અને વેસ્ટ ઇન્ડીઝના ખેલાડીઓએ ૪-૪ વખત ૧૦૦ રનનો આંકડો પાર કરીને ટોટલ ૮ સદી ફટકારી દીધી છે. ત્રણ વન-ડે મૅચની સિરીઝમાં આ સૌથી વધુ સદીનો રેકૉર્ડ છે. રસપ્રદ વાત તો એ છે કે ત્રણ કે એથી વધુ મૅચની સિરીઝની પહેલી બે મૅચમાં પણ ક્યારેય પાંચથી વધુ સદી જોવા નથી મળી હતી.