પ્રદીપ પુર્ણેકર મર્ડરકેસમાં પોલીસે શૂટર અને તેના સાથીદારને પકડ્યા

નવા પકડાયેલા શંકાસ્પદ લોકોની ઓળખ શૂટર નિખિલ યાદવ અને તેના સાથીદાર નીતેશ પવાર તરીકે કરવામાં આવી છે

પ્રદીપ પુર્ણેકર

શિવસેના (UBT)ના થાણેના વિભાગીય પ્રમુખ પ્રદીપ પુર્ણેકરની હત્યાના મામલે થાણે પોલીસે શૂટર સહિત વધુ બે શંકાસ્પદ વ્યક્તિની ધરપકડ કરી છે. એનાથી કસ્ટડીમાં રહેલી કુલ વ્યક્તિની સંખ્યા ૩ થઈ ગઈ છે. પ્રદીપ પુર્ણેકરની થાણેના માનપાડા વિસ્તારમાં મંગળવારે રાતે ગોળી મારીને હત્યા કરવામાં આવી હતી.

નવા પકડાયેલા શંકાસ્પદ લોકોની ઓળખ શૂટર નિખિલ યાદવ અને તેના સાથીદાર નીતેશ પવાર તરીકે કરવામાં આવી છે. પોલીસ-અધિકારીઓના જણાવ્યા અનુસાર ટેક્નિકલ સર્વેલન્સ દ્વારા આ બન્નેનો પત્તો મેળવ્યો હતો. ગોવા તરફ ભાગવાનો પ્રયાસ કરતી વખતે રાયગડ જિલ્લાના અલીબાગ નજીક તેમને અટકાવીને ધરપકડ કરવામાં આવી હતી.

ADVERTISEMENT

પોલીસે હુમલામાં સામેલ અન્ય ૪ શંકાસ્પદ વ્યક્તિની ઓળખ કરી છે. ફરાર આરોપીઓને પકડવા માટે થાણે, રાયગડ અને આસપાસના વિસ્તારોમાં શોધખોળ ચાલુ છે. થાણે પોલીસે આ હાઈ-પ્રોફાઇલ કેસની દેખરેખ માટે એક વિશેષ તપાસટીમ પણ બનાવી છે અને અનેક લોકોની પૂછપરછ કરવામાં આવી રહી છે.

થાણેનાં ભૂતપૂર્વ મેયર મીનાક્ષી શિંદેએ પોતાના પર લાગેલા આરોપો ફગાવ્યા

આ હત્યાને કારણે થાણેમાં મોટો રાજકીય વિવાદ સર્જાયો છે. પ્રદીપ પુર્ણેકરના પુત્ર રામ પુર્ણેકરે જાહેરમાં આરોપ લગાવ્યો છે કે થાણેનાં ભૂતપૂર્વ મેયર મીનાક્ષી શિંદે અને તેમના પતિ રાજેન્દ્ર શિંદેએ આ હત્યાનું કાવતરું રચ્યું હતું. આ દંપતીએ કોઈ પણ સંડોવણીનો સખત ઇનકાર કર્યો છે અને સત્ય બહાર લાવવા માટે પોલીસની ઝીણવટભરી તપાસની માગણી કરી છે. ચાલુ તપાસના ભાગરૂપે પોલીસે આ દંપતીની પણ પૂછપરછ કરી છે.