મેડિકલ સાયન્સમાં નવો વર્લ્ડ રેકૉર્ડ બન્યો, સૂવરની જિનેટિકલી મૉડિફાઇડ કિડની મૂકીને માણસ ૯ મહિના ડાયાલિસિસ વગર જીવ્યો
મેડિકલ સાયન્સમાં બન્યો નવો વર્લ્ડ રેકૉર્ડ
તબીબી વિજ્ઞાનના ઇતિહાસમાં એક ખૂબ જ મોટો અને ક્રાન્તિકારી ચમત્કાર સર્જાયો છે. ૬૬ વર્ષના ટિમ ઍન્ડ્રુઝ નામના દરદીના શરીરમાં સૂવરની જિનેટિકલી એન્જિનિયર્ડ કિડની ટ્રાન્સપ્લાન્ટ કરવામાં આવી હતી, જેની મદદથી તેઓ સતત ૯ મહિના સુધી ડાયાલિસિસ કરાવ્યા વગર એકદમ સ્વસ્થ જીવન જીવ્યા હતા. આ વૈશ્વિક રેકૉર્ડ બાદ હવે તેમને માનવ-કિડની પણ સફળતાપૂર્વક મળી ગઈ છે.
અમેરિકાની બાયોટેક કંપની eGenesis અને મેસ જનરલ બ્રિગમ દ્વારા તૈયાર કરવામાં આવેલી આ ખાસ કિડનીનું નામ EGEN-2784 છે. સૂવરની આ કિડનીમાં માનવશરીર સાથે મૅચ થાય એ માટે માનવજનીનો (Genes) ઉમેરીને ખાસ ફેરફારો કરવામાં આવ્યા હતા, જેથી માનવશરીર એને રિજેક્ટ ન કરે. આ સફળ પ્રયોગની વિગતો પ્રખ્યાત મેડિકલ જર્નલ ‘ધ લૅન્સેટ’માં પણ પ્રકાશિત થઈ છે.
દુનિયાભરમાં લાખો દરદીઓ કિડની-ફેલ્યરને કારણે માનવ-ઑર્ગનની રાહ જોતાં-જોતાં વર્ષો સુધી ડાયાલિસિસની દર્દનાક પ્રક્રિયામાંથી પસાર થાય છે. આ સફળતાએ સાબિત કરી દીધું છે કે જ્યાં સુધી માનવ-કિડની ન મળે ત્યાં સુધી સૂવરની જેનિટિકલી મૉડિફાઇડ કિડની દરદીને ડાયાલિસિસ વગર જીવંત રાખી શકે છે.
eGenesis કંપની હવે ૨૦૨૭થી આ ટેક્નૉલૉજીની મોટા પાયે ક્લિનિકલ ટ્રાયલ શરૂ કરવા જઈ રહી છે, જે ઑર્ગન-શૉર્ટેજની સમસ્યા ઉકેલવામાં ગેમ-ચેન્જર સાબિત થશે.
