એના માલિકને ૧૧ લાખથી વધુ રૂપિયાનું નુકસાન થયું હતું.
પ્રતીકાત્મક તસવીર
ચીનમાં એક પાળેલી બિલાડીએ ઊછળકૂદ કરવામાં ઘરને આગ લગાડી દીધી હતી અને એને લીધે એના માલિકને ૧૧ લાખથી વધુ રૂપિયાનું નુકસાન થયું હતું. ડેન્ડન નામની મહિલાને તેના ઘરમાં આગ લાગી છે એવો ફોન આવ્યો હતો. મહિલા ઘરે પહોંચી ત્યારે તેને ખબર પડી કે આને માટે તેની કૅટ જ જવાબદાર છે. જિંગોડિયાઓ નામની આ બિલાડી કિચનમાં રમતી હતી એ દરમ્યાન તેણે ઇન્ડક્શન કુકરની ટચ પૅનલ પર પગ મૂકી દીધો જેથી કુકર ચાલુ થઈ ગયું અને ઘરનો આખો ફર્સ્ટ ફ્લોર બળી ગયો હતો. ફાયર-ફાઇટર્સને આ બિલ્લી ઉપરના માળે એક કૅબિનેટમાંથી મળી આવી હતી. એ પોતે રાખથી ભરાઈ ગઈ હતી, પણ તેને કશી ઈજા નહોતી થઈ. ડેન્ડને પછી રમૂજમાં તેના સોશ્યલ મીડિયા પેજ પર એક માફીપત્ર લખ્યું હતું જેમાં તેની સાઇન અને બિલાડીના પંજાનાં નિશાન હતાં. તેણે કહ્યું કે આમ તો એ મારી જ ભૂલ હતી કે હું કુકરની પાવર સ્વિચ બંધ કરવાનું ભૂલી ગઈ હતી.
