નરેન્દ્ર મોદીએ ગણાવ્યા દેશના ત્રણ દુશ્મન

રાવણનું દહન કર્યા પછી કહ્યું કે દેશનાં માન-સન્માનને નુકસાન પહોંચાડનારી તાકાતો તેમ જ સમાજમાં ભાગલા પાડનારા લોકો અને ભારતીય સંસ્કૃતિને નફરત કરનારી વિચારધારા દેશ માટે મોટો ખતરો છે

ગઈ કાલે દિલ્હીમાં યોજાયેલી વિજયાદશમીની ઉજવણીમાં રાવણ પર તીર તાકતા નરેન્દ્ર મોદી.

દિલ્હીમાં આયોજિત દશેરા સમારોહમાં વડા પ્રધાન નરેન્દ્ર મોદીએ દેશ સમક્ષ રહેલા સૌથી મોટા પડકારો વિશે અત્યંત મહત્ત્વનું સંબોધન કર્યું હતું. વિજયાદશમીના પાવન અવસરે રાવણ દહન કર્યા બાદ પોતાના સત્તાવાર ભાષણમાં તેમણે દેશના મુખ્ય ૩ દુશ્મનોનો ખાસ ઉલ્લેખ કર્યો હતો. વડા પ્રધાને જણાવ્યું હતું કે દેશનાં માન અને સન્માનને નુકસાન પહોંચાડનારી તાકાતો 
તેમ જ સમાજમાં ભાગલા પાડનારા લોકો અને ભારતીય સંસ્કૃતિને નફરત કરનારી વિચારધારા દેશ માટે મોટો ખતરો છે

ADVERTISEMENT

ગઈ કાલે ગિરગામ ચોપાટી પર શ્રી આદર્શ રામલીલા મહોત્સવમાં રાવણદહન જોવા માટે માનવમહેરામણ ઊમટ્યો હતો. તસવીર : આશિષ રાજે

આ તમામ પડકારોનો સામનો કરવા માટે સમગ્ર દેશે એકજૂથ થવું જ પડશે એમ જણાવતાં નરેન્દ્ર મોદીએ કહ્યું હતું કે ‘વિજયાદશમી અધર્મ પર ધર્મના વિજયનું મોટું પ્રતીક છે જે આપણને ભગવાન રામના આદર્શો પર ચાલવાની પ્રેરણા આપે છે. રામ રાજ્ય એટલે એવું આદર્શ શાસન જ્યાં કોઈની પણ સાથે ભેદભાવ ન થાય. દરેક નાગરિકને સમાન ન્યાય મળે અને સૌને આગળ વધવાની પૂરતી તક મળે એ રામ રાજ્યનો મૂળ પાયો છે. ગરીબો અને વંચિતોની સેવા કરવી એ સરકાર અને સમાજ બન્નેની મુખ્ય જવાબદારી છે. વિકસિત અને આત્મનિર્ભર ભારત બનાવવા માટે દેશવાસીઓએ પોતાનાં સામર્થ્ય અને સંસાધનો પર પૂરો ભરોસો રાખવો પડશે. જ્યારે દેશના તમામ લોકો ભેગા મળીને કોઈ એક લક્ષ્ય માટે ખરા દિલથી કામ કરે છે ત્યારે મોટી મુશ્કેલીઓનો સામનો કરવો એકદમ સરળ બની જાય છે. સૌના સામૂહિક પ્રયાસોથી જ બૂરાઈ પર વિજય મેળવી શકાશે.’