ઍર સ્ટ્રાઇક બાદ નરેન્દ્ર મોદી સ્ટેડિયમ અને ઈડન ગાર્ડન્સને બૉમ્બથી ઉડાવી દેવાની ધમકી મળી

ઈ-મેઇલ મળી એ પછી સ્ટેડિયમની સિક્યૉરિટી વધારવાની સાથે સઘન તપાસ કરવામાં આવી

નરેન્દ્ર મોદી સ્ટેડિયમ, ઈડન ગાર્ડન્સ

ભારતે પાકિસ્તાનમાં ઍર સ્ટ્રાઇક કર્યાના ગણતરીના કલાકમાં ગઈ કાલે અમદાવાદમાં આવેલા દુનિયાના સૌથી મોટા નરેન્દ્ર મોદી સ્ટેડિયમને બૉમ્બથી ઉડાવી દેવાની ધમકી આપતી ઈ-મેઇલ મળી હતી. આ ઈ-મેઇલ પાકિસ્તાનના નામથી મોકલવામાં આવી હતી. આથી ગુજરાત ક્રિકેટ અસોસિએશને (GCA) આ ધમકીને ગંભીરતાથી લઈને સ્ટેડિયમની સિક્યૉરિટીમાં વધારો કરવાની સાથે સઘન તપાસ કરી હતી. પાકિસ્તાન જેકેના નામથી GCAને આવેલી ઈ-મેઇલમાં ‘We Will Blast Your Studium’ લખવામાં આવ્યું હતું.

આવી જ રીતે ગઈ કાલે કલકત્તાના ઈડન ગાર્ડન્સ સ્ટેડિયમને પણ બૉમ્બથી ઉડાવી દેવાની ધમકી આપતી ઈ-મેઇલ ક્રિકેટ અસોસિએશન ઑફ બેન્ગૉલને મળી હતી. ગઈ કાલે ચેન્નઈ સુપર કિંગ્સ અને કોલકાત્તા નાઇટ રાઇડર્સ વચ્ચે IPLની મૅચ રમાઈ રહી હતી એ સમયે જ ધમકી મળતાં સ્ટેડિયમની સુરક્ષામાં વધારો કરવામાં આવ્યો હતો અને મૅચ જોવા ગયેલા દર્શકોની તપાસ કરવામાં આવી હોવાનું જાણવા મળ્યું હતું.