ઘરની ગૅલેરીમાં કોઈ બેઠું છે એવું લાગે એ રીતે કપડાં પહેરેલું પૂતળું મૂકવામાં આવે છે : રોજ એની પોઝિશન અને કપડાં બદલવામાં આવે છે જેથી ચોરોને એ પૂતળું હોવાનો ખ્યાલ ન આવે
વસઈમાં ઘરની બાલ્કનીમાં માણસનું પૂતળું રાખીને ચોરોથી બચવાનો પ્રયાસ કરવામાં આવી રહ્યો છે.
ચોરી કરવા માટે ચોરો અનેક રસ્તા અપનાવતા હોય છે ત્યારે તેમનાથી બચવા અને ઘરની સુરક્ષા કરવા આપણે દરવાજાને તાળું મારતા હોઈએ છીએ. આમ છતાં ચોરી થતી હોય છે એટલે લોકોમાં ડર રહેતો હોય છે. જોકે હવે ચોરોને ડરાવવા વસઈના એક પરિવારે અનોખો આઇડિયા શોધી કાઢ્યો છે. તેમણે પોતાના બંગલાની ગૅલરીમાં માણસ જેવા દેખાતા પૂતળાને મૂક્યું છે. એના પર નજર પડે તો એવું જ લાગે કે ઘરની કોઈ વ્યક્તિ ત્યાં આવીને બેસી છે. એને કારણે ચોરો એ ઘરની આસપાસ ફરકતા નથી. આ આઇડિયાને હવે આ વિસ્તારના અન્ય લોકો પણ અજમાવી રહ્યા છે છે.
વસઈ-વેસ્ટમાં ઘણાં જૂનાં નાનાં ગામો આવેલાં છે. આ ગામોમાં રમણીય અને શાંતિપૂર્ણ વાતાવરણમાં બંગલાઓ અને ઘરો હોય છે. સ્થાનિક લોકો હવેલી જેવા બંગલામાં રહે છે. રાતના સમયે આ વિસ્તારોમાં લોકોની અવરજવર ખૂબ ઓછી થઈ જતી હોવાથી એનો લાભ લઈને ગામમાં ચોર અને લૂંટારાઓ ફરતા હોય છે એટલે ચોરીના અનેક બનાવો અવારનવાર બની રહ્યા છે. ક્લોઝ્ડ સર્કિટ ટેલિવિઝન (CCTV) કૅમેરા હોવા છતાં ચોરો મોઢું છુપાવીને બંગલામાં ચોરી કરવા આવે છે. એથી વસઈના પરિવારોએ આવા ચોરોથી બચવા અનોખી રીત શોધી છે.