પાલઘરમાં ગાયબ થઈ ગયેલી આઠ વર્ષની છોકરીને પોલીસે ત્રણ દિવસમાં શોધી કાઢી

મહારાષ્ટ્રના પાલઘર જિલ્લામાં ૮ વર્ષની ખોવાઈ ગયેલી એક આદિવાસી છોકરીને પોલીસે શોધી કાઢી હતી

પ્રતીકાત્મક તસવીર

આશ્રમ સ્કૂલમાં ગમતું નહોતું એટલે જાતે જ નીકળીને બીજા ગામમાં પહોંચી ગઈ હતી, CCTV કૅમેરાનાં ફુટેજના આધારે પોલીસે પગેરું મેળવ્યું

મહારાષ્ટ્રના પાલઘર જિલ્લામાં ૮ વર્ષની ખોવાઈ ગયેલી એક આદિવાસી છોકરીને પોલીસે શોધી કાઢી હતી અને તેના પરિવાર સાથે તેનું ફરી મિલન કરાવ્યું હતું. વાડા તાલુકાની એક સરકારી આશ્રમ સ્કૂલમાં આ છોકરીને તેના પરિવારે ભણવા મૂકી હતી. આ જ સ્કૂલમાં તેનો ભાઈ પણ ભણતો હતો. જોકે ૬ નવેમ્બરે શાળાનાં હેડ ટીચરે પોલીસને જાણ કરી હતી કે તે છોકરી સ્કૂલના કૅમ્પસમાંથી ગાયબ થઈ ગઈ છે.

ADVERTISEMENT

વાડા પોલીસ-સ્ટેશનના અધિકારીએ આપેલી માહિતી પ્રમાણે છોકરીને સ્કૂલમાં રહેવું ગમતું નહોતું અને ઘરે પાછી જવા માગતી હતી એટલે જાતે જ કૅમ્પસમાંથી નીકળી ગઈ હતી. નજીકના વિસ્તારોમાં તપાસ શરૂ કરીને પોલીસે સ્થાનિક લોકોની પૂછપરછ કરી હતી અને ક્લોઝ્ડ-સર્કિટ ટેલિવિઝન (CCTV) કૅમેરાનાં ફુટેજ સ્કેન કર્યાં હતાં. એક ફુટેજમાં છોકરી એકલી ચાલતી દેખાઈ હતી, જ્યારે અન્ય ફુટેજમાં એક ગામ તરફ જતી દેખાઈ હતી. પોલીસે સ્થાનિક રહેવાસીઓ સાથે વાતચીત કરીને એ ગામમાં એક મહિલાના ઘરેથી છોકરીને શોધી કાઢી હતી.