Mumbai News: સ્ટેન્ડ-અપ કોમેડિયન પ્રણિત મોરેના શો દરમિયાન થયેલી ‘રૂ. 370ની બિરયાની’ સંબંધિત ટિપ્પણીનો વિવાદ હવે મુંબઈ પોલીસ સુધી પહોંચી ગયો છે.
વાયરલ પોસ્ટનો સ્ક્રીન ગરૅબ (તસવીર સૌજન્ય: સોશિયલ મીડિયા)
સ્ટેન્ડ-અપ કોમેડિયન પ્રણિત મોરેના શો દરમિયાન થયેલી ‘રૂ. 370ની બિરયાની’ સંબંધિત ટિપ્પણીનો વિવાદ હવે મુંબઈ પોલીસ સુધી પહોંચી ગયો છે. સોશિયલ મીડિયા પર જાગૃતિ ફેલાવવા માટે જાણીતી મુંબઈ પોલીસે આ મુદ્દે એક ખાસ ઇન્સ્ટાગ્રામ પોસ્ટ શેર કરી છે, જે ઝડપથી વાયરલ થઈ રહી છે.
મુંબઈ પોલીસની પોસ્ટમાં સફેદ બેકગ્રાઉન્ડ પર મોટા અક્ષરોમાં રૂ. 370 લખવામાં આવ્યું હતું, જેમાં ‘0’ની જગ્યાએ બિરયાનીની થાળી દર્શાવવામાં આવી હતી. પોસ્ટમાં લખવામાં આવ્યું હતું, “રૂ. 370માં તમને બિરયાનીની એક પ્લેટ મળી શકે છે. પરંતુ અમારા લોક-અપમાં વધુ સમય રોકાશો તો મફત ભોજન પણ મળી શકે છે.” પોસ્ટના અંતે #BiryaniIsNotConsent હેશટેગનો ઉપયોગ કરવામાં આવ્યો હતો.
ADVERTISEMENT
મુંબઈ પોલીસનો સ્પષ્ટ સંદેશ
પોસ્ટના કેપ્શનમાં મુંબઈ પોલીસે લખ્યું હતું કે “પસંદગી તમારી છે.” કોઈનું નામ લીધા વિના પોલીસે સ્પષ્ટ સંદેશ આપ્યો કે કોઈ વ્યક્તિ પર ખર્ચ કરવો અથવા તેને બહાર લઈ જવું એ તેની સંમતિ સમાન નથી. આ પોસ્ટ એવા સમયે સામે આવી છે જ્યારે પ્રણિત મોરેના સ્ટેન્ડ-અપ શોની એક ક્લિપ સોશિયલ મીડિયા પર ભારે ચર્ચાનો વિષય બન્યો છે.
View this post on Instagram
શું છે સમગ્ર વિવાદ?
વિવાદની શરૂઆત પ્રણિત મોરેના ‘ક્રાઉડ વર્ક’ વીડિયોના એક વાયરલ ક્લિપથી થઈ હતી. આ ક્લિપમાં દર્શકોમાં હાજર હિમાંશુ જાંગડા નામના વ્યક્તિએ એક મહિલાને બહાર લઈ જવા અને તેના પર રૂ. 370ની ચિકન બિરયાનીનો ખર્ચ કર્યો હોવાની વાત કરી હતી. ત્યારબાદ તેણે એવી ટિપ્પણી કરી હતી કે ખર્ચ કર્યાના બદલામાં તેને શારીરિક સંબંધની અપેક્ષા હતી.
આ નિવેદન સામે સોશિયલ મીડિયા પર ભારે વિરોધ થયો હતો. અનેક લોકોએ તેને મહિલાઓ પ્રત્યે અપમાનજનક અને ખતરનાક માનસિકતાનું પ્રતિબિંબ ગણાવ્યું હતું. વિવેચકોનું કહેવું હતું કે આ પ્રકારની ટિપ્પણીઓ સંમતિ (Consent)ને એક વ્યવહાર તરીકે રજૂ કરે છે, જે સંપૂર્ણપણે અસ્વીકાર્ય છે.
યુઝર્સે શું કહ્યું?
મુંબઈ પોલીસની પોસ્ટ પર પણ મિશ્ર પ્રતિસાદ જોવા મળ્યો હતો. કેટલાક લોકોએ પોસ્ટના સંદેશની પ્રશંસા કરી હતી, જ્યારે કેટલાકે પોલીસ દ્વારા ટ્રેન્ડિંગ મુદ્દાઓ પર મીમ્સ બનાવવાની ટીકા કરી હતી.
એક યુઝરે લખ્યું, “ભાઈ, તમે મુંબઈ પોલીસ છો. દરેક ટ્રેન્ડિંગ મુદ્દા પર મીમ્સ બનાવવાનું બંધ કરો.” જ્યારે અન્ય ઘણા યુઝર્સે પોસ્ટને સમર્થન આપતાં જણાવ્યું હતું કે ‘ના’નો અર્થ હંમેશાં ‘ના’ જ હોય છે અને કોઈ મહિલા સાથે બહાર જવું કે તેના પર ખર્ચ કરવો એ તેની સંમતિ મેળવવાનો અધિકાર આપતું નથી.
પ્રણિત મોરેની પણ થઈ ટીકા
વિવાદ માત્ર ક્લિપમાં ટિપ્પણી કરનાર વ્યક્તિ સુધી સીમિત રહ્યો નહોતો. સોશિયલ મીડિયા પર પ્રણિત મોરેની પણ ટીકા થઈ હતી. ઘણા લોકોએ પ્રશ્ન ઉઠાવ્યો હતો કે શો દરમિયાન આવી ટિપ્પણી સામે તેમણે તરત વાંધો કેમ ન ઉઠાવ્યો અને બાદમાં આ ક્લિપ સોશિયલ મીડિયા પર શેર કેમ કરી.
વિવાદ વધતા પ્રણિત મોરેએ ઇન્સ્ટાગ્રામ પર માફી માગી હતી. તેણે સ્વીકાર્યું હતું કે તે સમયે વધુ જવાબદારીપૂર્વક વર્તન કરવું જોઈએ હતું અને આવી ટિપ્પણીનો વિરોધ કરવો જોઈએ હતો. જોકે, તેની માફી બાદ પણ સોશિયલ મીડિયા પર ચર્ચા અને ટીકા ચાલુ રહી હતી.
વિવાદે લીધો નવો વળાંક
આ સમગ્ર વિવાદ વચ્ચે એવી પણ માહિતી સામે આવી હતી કે ક્લિપ વાયરલ થયા બાદ હિમાંશુ જાંગડાને તેની નોકરીમાંથી હટાવવામાં આવ્યો હતો. બીજી તરફ, સતત વધી રહેલી ટીકા વચ્ચે પ્રણિત મોરેએ પોતાનું ઇન્સ્ટાગ્રામ એકાઉન્ટ પણ ડિએક્ટિવેટ કરી દીધું હોવાનું કહેવાઈ રહ્યું છે.
મુંબઈ પોલીસની આ પોસ્ટને અત્યાર સુધીની સૌથી નોંધપાત્ર સત્તાવાર પ્રતિક્રિયાઓમાંની એક માનવામાં આવી રહી છે. પોસ્ટ દ્વારા પોલીસે સ્પષ્ટ સંદેશ આપ્યો છે કે કોઈપણ પ્રકારના ખર્ચ, ભેટ કે મુલાકાતના આધારે કોઈ વ્યક્તિની સંમતિ માની શકાતી નથી અને સંમતિ હંમેશાં સ્વૈચ્છિક તથા સ્પષ્ટ હોવી જરૂરી છે.
