બ્રીચ કૅન્ડી પર રૅશ ડ્રાઇવિંગ કરવા બદલ ગામદેવી પોલીસ-સ્ટેશનમાં તેની સામે FIR નોંધાયો હતોઃ એ વખતે તે એ જ કાર ચલાવી રહ્યો હતો જે રવિવારે સવારે કોસ્ટલ રોડ પરથી ખાબકીને નીચે પડી
૨૮ માર્ચની ઘટના વખતે શનય ગજ્જર અને તેની કાર.
રવિવારે સવારે કોસ્ટલ રોડ પર પૂરપાટ કાર ચલાવીને પોતાના સહિત ૩ મિત્રોનો જીવ લેનાર શનય ગજ્જર સામે આ પહેલાં ગામદેવી પોલીસ-સ્ટેશનમાં માર્ચ મહિનામાં બેદરકારીપૂર્વક ડ્રાઇવિંગ કરવાનો ફર્સ્ટ ઇન્ફર્મેશન રિપોર્ટ (FIR) નોંધાયો હતો. એ ઘટના ૨૮ માર્ચે બની હતી. એ કેસમાં ફરિયાદી ઓમકાર શિર્કેએ કહ્યું હતું કે ‘કોસ્ટલ રોડ પર જે કારનો ઍક્સિડન્ટ થયો અને ૩ લોકોનાં મોત થયાં એ જ કાર અને એના ડ્રાઇવર સામે મેં ૨૮ માર્ચે ફરિયાદ નોંધાવી હતી. એ દિવસે પણ આ જ કારના ડ્રાઇવરે બહુ રૅશ ડ્રાઇવિંગ કર્યું હતું. તેણે બ્રીચ કૅન્ડી પર અમને કટ મારીને જોરદાર સ્પીડમાં કાર આગળ ભગાવી મૂકી હતી. એ પછી મેં તેનો પીછો કરીને મહાલક્ષ્મી મંદિર પાસે તેને પકડી પાડ્યો હતો અને રોકીને પૂછ્યું હતું. તેણે અમારા માટે જોખમી સાબિત થઈ શકે એ રીતનું બેજવાબદારીભર્યું ડ્રાઇવિંગ કર્યું હતું. એ લોકોએ (કારમાં ટ્રાવેલ કરનારાઓએ) અમારી સાથે ઉદ્ધતાઈભર્યું વર્તન કર્યું હતું. એ વખતે પણ કાર આ જ યુવાન (શનય) ચલાવી રહ્યો હતો. એથી આખરે મેં ગામદેવી પોલીસ-સ્ટેશનમાં તેની સામે ફરિયાદ કરી હતી.’
ADVERTISEMENT
અમદાવાદમાં નવરંગપુરામાં સ્વસ્તિક સોસાયટીમાં આવેલો શનય ગજ્જરના પરિવારનો બંગલો, જ્યાં સ્વજનો સાંત્વન આપવા પહોંચ્યા હતા. તસવીરો: મયૂર ભટ્ટ
એ ઘટનાનો એક વિડિયો પણ સોશ્યલ મીડિયામાં ફરતો થયો છે જેમાં DD 01 C 6302 નંબરની એ જ કાર દેખાઈ રહી છે જે રવિવારે કોસ્ટલ રોડ પરથી ઊછળીને નીચે પડી હતી. વાઇરલ વિડિયોમાં જોઈ શકાય છે કે શનય સાથે અન્ય લોકો કેમ કાર આટલી ફાસ્ટ ચલાવે છે એવી ફરિયાદ કરતા અને જીભાજોડી કરતા જણાય છે. શનય પણ તેમની સાથે દલીલ કરતો જણાય છે.
