પૃથ્વીરાજનું શૂટિંગ શરૂ કર્યું અક્ષયકુમારે
અક્ષય કુમાર, માનુષી છિલ્લર
ઇતિહાસનાં પાનાં ઊથલાવતી ફિલ્મ ‘પૃથ્વીરાજ’નું અક્ષયકુમારે અને સોનુ સૂદે શૂટિંગ શરૂ કરી દીધું છે. આ ફિલ્મમાં માનુષી છિલ્લર અને સંજય દત્ત પણ લીડ રોલમાં જોવા મળશે. માનુષી 13 ઑક્ટોબરે તો સંજય દત્ત દિવાળી બાદ શૂટિંગ શરૂ કરશે. બહાદુર રાજા પૃથ્વીરાજ ચૌહાણના સાહસની ગાથા આ ફિલ્મમાં દેખાડવામાં આવશે. અક્ષયકુમાર પૃથ્વીરાજ અને માનુષી સંયોગિતાનું પાત્ર ભજવી રહી છે. આ ફિલ્મ દ્વારા તે બૉલીવુડમાં એન્ટ્રી કરી રહી છે. કોરોના મહામારીને કારણે બધા શૂટિંગ પર બ્રેક લાગી ગઈ હતી. જોકે અક્ષયકુમાર ‘બેલબૉટમ’ના શૂટિંગ બાદ હવે મુંબઈમાં આ ફિલ્મનું શૂટિંગ કરી રહ્યો છે. યશરાજ ફિલ્મ્સ સ્ટુડિયોમાં આ ફિલ્મનું શૂટિંગ ખૂબ જ સાવચેતી રાખીને શરૂ કરવામાં આવ્યું છે અને એ માટે સ્પેશ્યલ સેટ બનાવવામાં આવ્યો છે. આ વિશે ફિલ્મના ડિરેક્ટર ડૉક્ટર ચન્દ્રપ્રકાશ દ્વિવેદીએ કહ્યું હતું કે ‘હા, અમે ‘પૃથ્વીરાજ’નું શૂટિંગ યશરાજ ફિલ્મ્સ સ્ટુડિયોમાં શરૂ કર્યું છે. પૂરી ટીમ આખા શેડ્યુલ માટે ખૂબ ઉત્સાહિત છે.’