નફીસા અલી સોઢી હાલમાં પેરીટોનિયલ (પેટની અંદરના આવરણ) અને ઓવેરિયન કૅન્સરને લડત આપીને સાજાં થયાં છે.
નફીસા અલી સોઢી
નફીસા અલી સોઢી હાલમાં પેરીટોનિયલ (પેટની અંદરના આવરણ) અને ઓવેરિયન કૅન્સરને લડત આપીને સાજાં થયાં છે. આ બીમારી સામે લડત આપ્યા પછી ૬૯ વર્ષનાં નફીસાએ રોહતાંગ પાસ નજીક ૧૧,૦૦૦ ફુટની ઊંચાઈ સુધી ટ્રેકિંગ કરવાની સિદ્ધિ મેળવી છે. આ ટ્રેકિંગનો અનુભવ જણાવતાં નફીસાએ કહ્યું હતું કે સર્જરી તથા અનેક કીમોથેરપી સેશન બાદ આ અનુભવથી તેમને ‘નવીનતા’ની લાગણી થઈ રહી છે.
નફીસાએ મંગળવારે સોશ્યલ મીડિયા પર તેમના આ ટ્રેકિંગનો વિડિયો શૅર કરીને પરિવાર અને મિત્રોના સહયોગ માટે આભાર વ્યક્ત કર્યો. આ વિડિયોની કૅપ્શનમાં તેમણે લખ્યું હતું કે ‘૧૧,૦૦૦ ફુટની ઊંચાઈએ મિત્રો અને પરિવાર સાથે એક અદ્ભુત પિકનિક માટે ટ્રેકિંગ કર્યું. વિડિયોમાં તમે જોઈ શકો છો કે મારો જમાઈ અને મારો દોહિત્ર મને નીચે ઊતરવામાં મદદ કરી રહ્યા છે. સર્જરી અને અનેક કીમોથેરપી બાદ આ અનુભવથી મને ફરી એકદમ નવા જેવી લાગણી થઈ. અટલ ટનલ પાર કર્યા બાદ અમે સિસ્સુ નામના સ્થળે ૧૧,૦૦૦ ફુટની ઊંચાઈએ પિકનિક લંચ લીધું હતું. આ ખરેખર ભવ્ય અને યાદગાર અનુભવ હતો. રોહતાંગ નજીક ૧૧,૦૦૦ ફુટની ઊંચાઈએ મારો જમાઈ આદિલ અને દોહિત્ર આમૈર મને પથ્થરો પર ચડાવવામાં મદદ કરી રહ્યા હતા. આખરે હું કાર સુધી પહોંચી ગઈ. આ ખૂબ જ મજેદાર અનુભવ રહ્યો.’
