નિતેશ તિવારીની ‘રામાયણ’માં નહીં દેખાય હૃતિક રોશન?

તેને નેગેટિવ રોલ નહીં, હીરોના રોલ વધુ કરવા છે

નિતેશ તિવારી

નિતેશ તિવારીની ‘રામાયણ’માં હવે હૃતિક રોશન નહીં દેખાય એ‍વી ચર્ચા છે. આ ફિલ્મમાં તે નેગેટિવ રોલમાં દેખાવાનો હતો. જોકે હવે તેની ઇચ્છા નેગેટિવ રોલ કરવાની જરા પણ નથી અને આ જ કારણ છે કે તેણે આ ફિલ્મમાંથી બહાર નીકળવાનો નિર્ણય લીધો છે. હૃતિકનું માનવું છે કે તેના ફૅન્સ તેને નેગેટિવ રોલમાં નહીં પરંતુ હીરોના રોલમાં જોવાનું પસંદ કરે છે. તેને પણ ‘રામાયણ’ની સ્ક્રિપ્ટ પસંદ પડી હતી. નિતેશ તિવારી અને પ્રોડ્યુસર મધુ મન્ટેના સાથે ચર્ચા કર્યા બાદ હૃતિકે આ ફિલ્મની ના પાડી દીધી છે. એથી હવે ‘રામાયણ’ના મેકર્સે આ રોલ માટે સાઉથના યશ તરફ નજર ફેરવી છે. યશ તેની ‘KGF : ચૅપ્ટર 2’ને લઈને ટૉક-ઑફ-ધ-ટાઉન બન્યો છે. મેકર્સને લાગે છે કે ‘રામાયણ’માં રાવણના રોલ માટે યશ ફિટ બેસે છે. એથી તેની સાથે ચર્ચા શરૂ કરી છે. એવું જાણવા મળ્યું છે કે યશને ફિલ્મની સ્ક્રિપ્ટ ગમી છે. આ ફિલ્મમાં રણબીર કપૂર પણ જોવા મળવાનો છે. મેકર્સ દ્વારા હવે સત્તાવાર જાહેરાત કરવાની બાકી છે.