હૃતિક રોશને ગોરેગાંવ-ઈસ્ટમાં આવેલી ૨૭૨૭ સ્ક્વેર ફુટની કમર્શિયલ ઑફિસ-સ્પેસ પાંચ વર્ષ માટે લીઝ પર આપી છે, જેમાં તેને કુલ અંદાજે ૪.૮૪ કરોડ રૂપિયા ભાડું મળશે.
હૃતિક રોશન
હૃતિક રોશને ગોરેગાંવ-ઈસ્ટમાં આવેલી પોતાની કમર્શિયલ ઑફિસ-સ્પેસ લીઝ પર આપીને કરોડોની ડીલ કરી છે. પ્રૉપર્ટી-રજિસ્ટ્રેશનના દસ્તાવેજો મુજબ હૃતિકે લોટસ કૉર્પોરેટ પાર્કમાં ઈ-વિંગના ૧૪મા માળે આવેલી તેની માલિકીની ૨૭૨૭ સ્ક્વેર ફુટની ઑફિસ-સ્પેસ લીઝ પર આપી છે. આ લીઝના પાંચ વર્ષના કરાર હેઠળ હૃતિકને કુલ અંદાજે ૪.૮૪ કરોડ રૂપિયા ભાડું મળશે.
આ કરાર મુજબ દર વર્ષે ભાડામાં પાંચ ટકાનો વધારો થશે. પ્રથમ વર્ષે માસિક ભાડું ૭.૩૦ લાખ રૂપિયા રહેશે, જ્યારે બીજા વર્ષે એ વધીને ૭.૬૭ લાખ, ત્રીજા વર્ષે ૮.૦૫ લાખ, ચોથા વર્ષે ૮.૪૫ લાખ અને પાંચમા વર્ષે ૮.૮૭ લાખ રૂપિયા થશે. આ રીતે પાંચ વર્ષમાં કુલ ભાડાની રકમ લગભગ ૪.૮૪ કરોડ રૂપિયા થશે.
