સ્ક્રીન, પ્લેસ્ટેશન કરતાં સ્પોર્ટ્સ સેન્ટર અને પ્લેગ્રાઉન્ડ પર મહત્ત્વ આપવાનું સૂચન કર્યું વડા પ્રધાને
આપણે અડધી ઑલિમ્પિક્સ રમતોમાં તો ભાગ પણ નથી લેતા, એમાં સુધારાની જરૂર છે : નરેન્દ્ર મોદી
નૅશનલ સ્પોર્ટ્સ ડેના બે દિવસ પહેલાં ગઈ કાલે વડા પ્રધાન નરેન્દ્ર મોદી ખેલો ઇન્ડિયા ડાયલૉગ દ્વારા દેશના યંગસ્ટર્સ સાથે જોડાયા હતા. દેશનાં અલગ-અલગ સ્થળોએથી સ્પોર્ટ્સ મિનિસ્ટર મનસુખ માંડવિયા, હજારો ખેલાડીઓ, વિદ્યાર્થીઓ વિડિયો-કૉન્ફરન્સિંગ દ્વારા આ ઇવેન્ટમાં જોડાયા હતા. નરેન્દ્ર મોદીએ પોતાની સ્પીચ દરમ્યાન મહત્ત્વપૂર્ણ નિવેદન આપ્યાં હતાં...
દેશનું એક કડવું સત્ય એ છે કે ઑલિમ્પિક્સમાં ઘણી બધી રમતો છે, પરંતુ ભારતીય ટીમો એમાંથી અડધામાં પણ ભાગ લેતી નથી.પૅરિસ ઑલિમ્પિક્સમાં આપણે ૩૨ રમતોમાંથી ૧૬ રમતોમાં જ ભાગ લીધો હતો. આપણે
મેડલ-ટૅલીના મોટા ભાગ માટે પણ સ્પર્ધા કરતા નથી અને આ દાયકાઓથી ચાલી રહ્યું છે. આપણી મેડલ-ટૅલી વધારવા માટે આપણે આ રમતોમાં પણ નિપુણતા પ્રાપ્ત કરવી જોઈએ.
આપણી પાસે લાંબો દરિયાકિનારો અને વિશાળ પર્વતીય ભૂપ્રદેશ છે. આપણી પાસે વૉટર સ્પોર્ટ્સથી લઈને વિન્ટર રમતો સુધીની દરેક વસ્તુ માટે જરૂરી વસ્તી અને ભૌગોલિક પરિસ્થિતિઓ છે. છતાં આ રમતોમાં આપણી પાસે મજબૂત હાજરીનો અભાવ છે. તેથી આપણે આવી રમતો માટે એક ઇકોસિસ્ટમ વિકસાવવા અને એને આગળ વધારવાની સંભાવના પર ધ્યાન કેન્દ્રિત કરવું જોઈએ.
મેં ૧૫ ઑગસ્ટે લાલ કિલ્લાની પ્રાચીર પરથી ભારતનું રમતગમતનું વિઝન રાષ્ટ્ર સમક્ષ રજૂ કર્યું. ઑલિમ્પિક્સમાં ભારતની ભાગીદારી વધારવા માટે મેં પાંચથી ૧૫ વર્ષની વયનાં બાળકો માટે રાષ્ટ્રવ્યાપી ટૅલન્ટ-હન્ટની જાહેરાત કરી હતી. એ ફક્ત મેડલ જીતવા વિશે નથી. એ વિકસિત ભારત બનાવવા માટે ભારતના રમતગમત કૌશલ્ય અને યુવા શક્તિને એકસાથે ઉપયોગમાં લેવાનું અભિયાન છે.
અમે નક્કી કર્યું છે કે ઑલિમ્પિક્સ 2036 માટે ભારત એવી રમતો પર ધ્યાન કેન્દ્રિત કરશે જેમાં એ હાલમાં ભાગ લેતું નથી અથવા ક્વૉલિફાય થતું નથી. અમે પ્રતિભા-શોધ અભિયાન શરૂ કરીશું.
કરીઅર અને અભ્યાસના સમયપત્રકમાં હવે રમતગમત સ્થાન મેળવી રહ્યું છે. આ પરિવર્તનને કારણે જ ભારતનો રમતગમત પ્રત્યેનો વિશ્વાસ વધી રહ્યો છે. જ્યારે સ્કૂલો રમતગમતને સહ-અભ્યાસક્રમ પ્રવૃત્તિ તરીકે નહીં પરંતુ જીવનશૈલી તરીકે જુએ છે ત્યારે રમતગમત સંસ્કૃતિનો ઉદ્ભવ થાય છે.
હું માનું છું કે સ્ક્રીન કરતાં સ્પોર્ટ્સ સેન્ટર વધુ મહત્ત્વપૂર્ણ છે. પ્લેસ્ટેશન કરતાં પ્લેગ્રાઉન્ડ મહત્ત્વનાં છે. આ ત્યારે જ બનશે જ્યારે આપણા યુવાનો આ માનસિકતાને આગળ ધપાવે છે. અમારી સરકાર ભારતમાં આધુનિક, ૨૧મી સદીની રમતગમત ઇકોસિસ્ટમ બનાવવા માટે સંપૂર્ણપણે પ્રતિબદ્ધ છે.
