ઓમાનમાં યોજાયેલી યુથ હૉકી 5s એશિયન ચૅમ્પિયનશિપમાં ભારતીય મેન્સ ટીમે પાકિસ્તાનને હરાવી ગોલ્ડ જીત્યો, જ્યારે વિમેન્સ ટીમે સિલ્વર મેળવ્યો. બન્ને ટીમોએ પ્રથમ યુથ હૉકી 5s વર્લ્ડ કપ માટે પણ ક્વૉલિફાય કર્યું.
Asian Championship 2026
ઓમાનમાં આયોજિત યુથ હૉકી 5s એશિયન ચૅમ્પિયનશિપમાં ભારતની મેન્સ અને વિમેન્સ ટીમે શાનદાર પ્રદર્શન કર્યું છે. આ ટુર્નામેન્ટમાં દરેક ટીમમાંથી માત્ર પાંચ ખેલાડી મેદાન પર રમે છે. શૉર્ટ અને ફાસ્ટેસ્ટ ફૉર્મેટની આ હૉકી મૅચોમાં પાંચ ખેલાડીઓમાંથી એક ગોલકીપર હોય છે.
ભારતની સબ-જુનિયર મેન્સ ટીમે ફાઇનલ મૅચમાં પાકિસ્તાન સામે ૩-૧થી જીત નોંધાવી હતી. ભારતની આ ટીમ સમગ્ર ટુર્નામેન્ટ દરમ્યાન અજેય રહી હતી. ભારતની વિમેન્સ ટીમને ફાઇનલમાં ચીન સામે ૨-૪ના સ્કોરથી હારનો સામનો કરવો પડ્યો હતો. ભારતની આ બન્ને ટીમો પહેલી વખત યોજાનારા યુથ હૉકી 5s વર્લ્ડ કપ માટે પણ ક્વૉલિફાય થઈ છે.
હૉકી ઇન્ડિયાએ યુથ મેન્સ ટીમના દરેક ખેલાડી માટે બે લાખ રૂપિયા અને સપોર્ટ સ્ટાફના સભ્યો માટે એક લાખ રૂપિયાના પુરસ્કારની જાહેરાત કરી છે, જ્યારે યુથ વિમેન્સ ટીમની દરેક ખેલાડીને એક લાખ રૂપિયા અને સપોર્ટ સ્ટાફના સભ્યોને ૫૦ હજાર રૂપિયા આપવામાં આવશે.
