ગુજરાતને એના ગઢમાં ક્યારેય માત નથી આપી શકી મુંબઈની પલટન

અમદાવાદમાં નવા સ્ટેડિયમમાં ગુજરાત સામે ચાર મૅચ હાર્યું છે, એકમાત્ર જીત જૂના મોટેરા સ્ટેડિયમમાં છેક ૨૦૧૪માં મળી હતી

હાર્દિક પંડ્યા અને શુભમન ગિલ

IPL 2026ની ૩૦મી મૅચ આજે વિશ્વપ્રખ્યાત નરેન્દ્ર મોદી ક્રિકેટ સ્ટેડિયમમાં રમાશે. હાર્દિક પંડ્યા માટે જૂની ટીમ સામે પોતાની વર્તમાન ટીમને જબરદસ્ત કમબૅક કરાવવાનો પડકાર હશે. પહેલી જીત બાદ મુંબઈ ઇન્ડિયન્સ લાગલગાટ ચાર મૅચ હાર્યું છે. શુભમન ગિલની ગુજરાત ટાઇટન્સ શરૂઆતની બે હાર બાદ જીતની હૅટ-ટ્રિક લગાવી ચૂક્યું છે. મુંબઈ માટે આજે હૅમસ્ટ્રિંગ ઇન્જરીથી પીડિત રોહિત શર્મા રમશે કે નહીં એના પર નજર હશે. મુંબઈ માટે હજી હાર્દિક પંડ્યા, સૂર્યકુમાર યાદવ, જસપ્રીત બુમરાહ, શાર્દૂલ ઠાકુર, ટ્રેન્ટ બોલ્ટ જેવા સ્ટાર પ્લેયર્સ અપેક્ષા અનુસારનું પ્રદર્શન નથી કરી રહ્યા.

મૅચનો સમય સાંજે ૭.૩૦ વાગ્યાથી

ADVERTISEMENT

બીજી તરફ ગુજરાતનો ટૉપ-ઑર્ડર શુભમન ગિલ, સાઈ સુદર્શન અને જૉસ હેઝલવુડ શાનદાર ફૉર્મમાં છે. ગ્લેન ફિલિપ્સ, વૉશિંગ્ટન સુંદર અને રાહુલ તેવતિયા હજી મિડલ-ઑર્ડરમાં સારું પ્રદર્શન કરી શક્યા નથી. પ્રસિદ્ધ ક્રિષ્ના અને રાશિદ ખાન ટીમના બોલિંગ યુનિટના મુખ્ય સ્તંભ બન્યા છે. મોહમ્મદ સિરાજ અને કૅગિસો રબાડા ખૂબ ખર્ચાળ સાબિત થયા છે. વિશ્વના આ સૌથી મોટા ક્રિકેટ સ્ટેડિયમમાં મુંબઈ ઇન્ડિયન્સની ટીમ ૭માંથી ૬ મૅચ હારી છે. નવા નરેન્દ્ર મોદી સ્ટેડિયમમાં મુંબઈ ૨૦૨૩થી પાંચ મૅચ રમ્યું છે એમાંથી ચાર મૅચમાં હોમ ટીમ અને અંતિમ મૅચ ક્વૉલિફાયર-ટૂ મૅચમાં પંજાબ કિંગ્સ સામે હાર્યું હતું. અગાઉ જ્યારે જૂના સ્ટેડિયમ એટલે કે મોટેરામાં મુંબઈ ૨૦૧૪-’૧૫ દરમ્યાન બે મૅચ રાજસ્થાન રૉયલ્સ સામે રમ્યું હતું અને માત્ર એક જીત ૨૦૧૪માં મેળવી શક્યું હતું. ગુજરાત પોતાના આ ગઢમાં પચીસમાંથી ૧૪ મૅચ જીત્યું છે અને ૧૧ મૅચ હાર્યું છે. વર્તમાન સીઝનની બે મૅચમાં ગુજરાત અહીં રાજસ્થાન સામે હાર્યું છે અને કલકત્તા સામે જીત્યું હતું. 

મુંબઈ ઇન્ડિયન્સમાં આવીને હાર્દિક પંડ્યાનો કૅપ્ટન્સી રેકૉર્ડ બગડ્યો