વિલ જૅક્સે પ્રથમ ૫૦ રન ૩૧ બૉલમાં કર્યા અને બીજા ૫૦ માત્ર ૧૦ બૉલમાં

વિલ જૅક્સની તોફાની અને વિરાટ કોહલીની આક્રમક બૅટિંગની મદદથી ગુજરાતના તોતિંગ સ્કોરને આસાનીથી આંબી લીધો બૅન્ગલોરે : ગુજરાતના ત્રણ વિકેટે ૨૦૦ના જવાબમાં બૅન્ગલોરના માત્ર ૧૬ ઓવરમાં ૧ વિકેટે ૨૦૬

વિરાટ કોહલી , વિલ જૅકસ

ઇન્ડિયન પ્રીમિયર લીગ (IPL)ની ૪૫મી મૅચ અમદાવાદના નરેન્દ્ર મોદી સ્ટેડિયમમાં રૉયલ ચૅલેન્જર્સ બેન્ગલુરુ અને ગુજરાત ટાઇટન્સ વચ્ચે ગઈ કાલે રમાઈ હતી. કૅપ્ટન શુભમન ગિલની ટીમ ગુજરાતે સાઈ સુદર્શનના ૮૪ રન અને શાહરુખ ખાનના ૫૮ રનની ઇનિંગ્સની મદદથી ૩  વિકેટ ગુમાવી ૧૯૯ રન ફટકાર્યા હતા.  વિરાટ કોહલીના ૭૦ રન અને વિલ જૅક્સના ૧૦૦ રનની મદદથી બૅન્ગલોરે ૧૬ ઓવરમાં જ ૧ વિકેટ ગુમાવીને ટાર્ગેટ ચેઝ કરી ૯ વિકેટથી ભવ્ય જીત મેળવી હતી. બૅન્ગલોરે ૧૪ વર્ષ બાદ બીજી વાર ૨૦૦ રનનો ટાર્ગેટ ચેઝ કર્યો હતો. આ પહેલાં બૅન્ગલોરે ૨૦૪ રનનો ટાર્ગેટ ૨૦૧૦માં પંજાબ કિંગ્સ સામે સફળતાપૂર્વક ચેઝ કર્યો હતો. 

૧૦ મૅચમાં ૪ ફિફ્ટી અને ૧ સેન્ચુરીની મદદથી વિરાટ કોહલી વર્તમાન સીઝનમાં ૫૦૦ રન ફટકારનાર પ્રથમ બૅટર બન્યો હતો. ૭ IPL સીઝનમાં ૫૦૦ પ્લસ રન કરીને તેણે ડેવિડ વૉર્નરના રેકૉર્ડની બરાબરી કરી હતી. ૫૦૦ રન સાથે ઑરેન્જ કૅપહોલ્ડર બનેલા વિરાટ કોહલીએ સનરાઇઝર્સ હૈદરાબાદ સામેની મૅચમાં ૪૦૦ રન પૂરા કર્યા હતા અને બીજી જ મૅચમાં ૫૦૦ રન પૂરા કરી તેણે T20 વર્લ્ડ કપ પહેલાં ટ્રોલર્સને જડબાતોડ જવાબ આપ્યો હતો. 

ADVERTISEMENT

ઇંગ્લૅન્ડનો પચીસ વર્ષનો વિલ જૅક્સ ૪૧ બૉલમાં ૧૦ સિક્સર અને પાંચ ચોગ્ગાની મદદથી સેન્ચુરી ફટકારી ચર્ચાનો વિષય બન્યો હતો. પ્રથમ ૫૦ રન તેણે ૩૧ બૉલમાં ફટકાર્યા હતા, પણ ત્યાર બાદના ૧૦ બૉલમાં જ તેણે બીજા ૫૦ રન ફટકારી પોતાની IPL સીઝનની પ્રથમ સેન્ચુરી પૂરી કરી હતી. ઇંગ્લૅન્ડ માટે ત્રણેય ફૉર્મેટમાં ૨૦ જેટલી મૅચ રમનાર ઑલરાઉન્ડર વિલ જૅક્સે હમણાં સુધી આંતરરાષ્ટ્રીય મૅચમાં માત્ર બે ફિફ્ટી ફટકારી હતી. માત્ર IPL મૅચ રમીને સેન્ચુરી ફટકારનાર વિલ જૅક્સને ૩.૨૦ કરોડમાં રૉયલ ચૅલેન્જર્સ બેન્ગલુરુએ ખરીદ્યો હતો. બૅક-ટુ-બૅક બીજી જીત મેળવીને બૅન્ગલોરે હૈદરાબાદ બાદ ગુજરાતની ટીમનું પ્લેઑફનું સમીકરણ બગાડ્યું હતું. પ્લેઑફ માટેના કટઑફ ૧૬ પૉઇન્ટ મેળવવા ગુજરાતની ટીમે આગામી ચારેય મૅચ મોટા અંતરથી જીતવી પડશે.