આજે સાણંદમાં ૨૨,૫૧૬ કરોડ રૂપિયાના દેશના પ્રથમ સેમિકન્ડક્ટર ઍસેમ્બલી અને ટેસ્ટિંગ પ્લાન્ટનું નરેન્દ્ર મોદી કરશે ઉદ્ઘાટન
નરેન્દ્ર મોદી
ઇઝરાયલની મુલાકાત લઈને આવ્યા બાદ વડા પ્રધાન નરેન્દ્ર મોદી આજે રાજસ્થાન અને ગુજરાતની મુલાકાત લેશે. તેઓ રાજસ્થાનમાં ૧૬,૬૮૦ કરોડ રૂપિયાના પ્રોજેક્ટ્સનું ઉદ્ઘાટન કરશે. ત્યાર બાદ તેઓ ગુજરાતમાં અમદાવાદ નજીક સાણંદમાં અમેરિકન ચિપમેકર માઇક્રોન ટેક્નૉલૉજીના સેમિકન્ડક્ટર ઍસેમ્બલી અને ટેસ્ટિંગ પ્લાન્ટનું ઉદ્ઘાટન કરશે, જે ભારતને ટેક્નૉલૉજીની રીતે આત્મનિર્ભર બનાવશે. ૨૨,૫૧૬ કરોડ રૂપિયાના રોકાણ સાથે આ અત્યાધુનિક પ્લાન્ટમાં ATMP (ઍસેમ્બલી, ટેસ્ટિંગ, માર્કિંગ અને પૅકેજિંગ) સુવિધા સ્થાપિત કરવામાં આવી છે.
સાણંદ પ્લાન્ટ ભારતની સેમિકન્ડક્ટર યાત્રામાં એક મોટું પગલું છે અને એને આ સ્કેલની દેશની પ્રથમ સેમિકન્ડક્ટર ફૅબ્રિકેશન-લિન્ક્ડ સુવિધા તરીકે વર્ણવવામાં આવી રહી છે. માઇક્રોન સેમિકન્ડક્ટર ટેક્નૉલૉજી ઇન્ડિયા પ્રાઇવેટ લિમિટેડે આ પ્રોજેક્ટમાં ૨૨,૫૧૬ કરોડ રૂપિયાનું રોકાણ કર્યું છે. ગુજરાત સરકારે જૂન ૨૦૨૩માં સાણંદ ખાતે સેમિકન્ડક્ટર ઍસેમ્બલી અને ટેસ્ટિંગ યુનિટની સ્થાપના માટે માઇક્રોન સાથે સમજૂતીકરાર (MoU) પર હસ્તાક્ષર કર્યા હતા.
ADVERTISEMENT
હાલમાં પ્લાન્ટ લગભગ ૨૦૦૦ લોકો રોજગારી આપે છે. સુવિધા સંપૂર્ણપણે કાર્યરત થયા પછી આ સંખ્યા બમણાથી વધારે થવાની ધારણા છે. આશરે ૫૦૦૦ લોકોને સીધી રોજગારી મળશે. આ પ્લાન્ટમાં દિવ્યાંગ નાગરિકો ઑપરેટર અને ટેક્નિશિયન તરીકે સેવા આપી રહ્યા છે. આ પ્રોજેક્ટ લગભગ ૧૫,૦૦૦ પરોક્ષ નોકરીઓનું પણ સર્જન કરશે.
સાણંદ સુવિધા સૉલિડ સ્ટેટ ડ્રાઇવ્સ (SSD) તેમ જ RAM-પ્રકારનાં DRAM (ડાયનૅમિક રૅન્ડમ ઍક્સેસ મેમરી) અને NAND ઉત્પાદનોનું ઉત્પાદન કરશે જેનો વ્યાપકપણે કમ્પ્યુટિંગ, સ્માર્ટફોન, સર્વર્સ, ડેટા સેન્ટર્સ અને પોર્ટેબલ ઇલેક્ટ્રૉનિક ઉપકરણોમાં ઉપયોગ થાય છે.
