શેરી કૂતરા મુદ્દે સુપ્રીમ કોર્ટનો આદેશ: તાત્કાલિક `ડૉગ શેલ્ટર્સ` બનાવવામાં આવે

સ્ટ્રીટ ડૉગ્સની સમસ્યાનો સામનો કરી રહેલા દિલ્હી અંગે સુપ્રીમ કોર્ટે એક મોટો આદેશ આપ્યો છે. દેશની સર્વોચ્ચ અદાલતે કહ્યું છે કે બધા સ્ટ્રીટ ડૉગ્સને 8 અઠવાડિયાની અંદર પકડીને `ડૉગ શેલ્ટર`માં ખસેડવામાં આવે. કોર્ટે એમ પણ કહ્યું છે કે આ ડૉગ્સને પાછા છોડવામાં આવશે નહીં.

 

રાષ્ટ્રીય રાજધાનીમાં શ્વાન કરડવાની ઘટનાઓ પર સ્વતઃ નોંધ લેતા, સુપ્રીમ કોર્ટે દિલ્હી સરકાર, એમસીડી, એનડીએમસીને શ્વાન માટે `આશ્રયસ્થાનો` બનાવવાનો નિર્દેશ આપ્યો. ન્યાયાધીશ જેબી પારડીવાલા અને આર મહાદેવનની બેન્ચે કહ્યું કે નવજાત શિશુઓ અને નાના બાળકો કોઈપણ કિંમતે સ્ટ્રીટ ડૉગ્સનો શિકાર ન બનવા જોઈએ. કોર્ટે કહ્યું કે પરિસ્થિતિ ખૂબ જ ગંભીર છે અને તાત્કાલિક પગલાં લેવાની જરૂર છે.

 

સુપ્રીમ કોર્ટે નિર્દેશ આપ્યો હતો કે સ્ટ્રીટ ડૉગ્સના નસબંધી અને રસીકરણ માટે આશ્રયસ્થાનોમાં પૂરતો સ્ટાફ હોવો જોઈએ. બેન્ચે કહ્યું કે સ્ટ્રીટ ડૉગ્સને આશ્રયસ્થાનોમાં રાખવા જોઈએ અને રસ્તાઓ, કૉલોની અને જાહેર સ્થળોએ છોડવા જોઈએ નહીં. બેન્ચે કહ્યું, `અમે વ્યાપક જાહેર હિતને ધ્યાનમાં રાખીને આ સૂચનાઓ જાહેર કરી રહ્યા છીએ.` સુપ્રીમ કોર્ટે અધિકારીઓને એક અઠવાડિયાની અંદર એક હેલ્પલાઇન સ્થાપિત કરવાનો પણ નિર્દેશ આપ્યો હતો જેથી શ્વાન કરડવાના તમામ કેસોની તાત્કાલિક જાણ કરી શકાય.

 

તાજેતરમાં, દિલ્હીના રોહિણી નજીક પૂથ કલાનમાં સ્ટ્રીટ ડૉગ્સ દ્વારા કરડવામાં આવેલા રેબિઝના કારણે 6 વર્ષની બાળકીના મૃત્યુ પછી, સુપ્રીમ કોર્ટે આ સમસ્યાનું સ્વતઃ ધ્યાન લીધું. આ અંગે પ્રકાશિત થયેલા એક મીડિયા અહેવાલનો ઉલ્લેખ કરતા, સુપ્રીમ કોર્ટે તેને `અત્યંત ચિંતાજનક` ગણાવ્યું હતું. કોર્ટે કહ્યું હતું કે શહેર અને તેની બહારના વિસ્તારોમાં દરરોજ સેંકડો ડૉગ્સ કરડવાના કિસ્સાઓ નોંધાઈ રહ્યા છે. શ્વાન કરડવાથી રેબિઝ થઈ રહ્યું છે. સામાન્ય રીતે બાળકો અને વૃદ્ધો તેનો ભોગ બની રહ્યા છે.

 

સુપ્રીમ કોર્ટે કહ્યું, આપણે શેરીઓ સંપૂર્ણપણે સ્ટ્રીટ ડૉગ્સથી મુક્ત બનાવવી પડશે. અમે કોઈને પણ દત્તક લેવાની મંજૂરી આપીશું નહીં. શેરીઓ સંપૂર્ણપણે સ્ટ્રીટ ડૉગ્સથી મુક્ત હોવી જોઈએ. સુપ્રીમ કોર્ટે કહ્યું કે આ મામલે ફક્ત સરકારની જ સુનાવણી કરવામાં આવશે અને ડૉગ લવર્સ કે અન્ય કોઈપણ પક્ષની અરજીઓ સ્વીકારવામાં આવશે નહીં. સુપ્રીમ કોર્ટે રાષ્ટ્રીય રાજધાની દિલ્હી, MCD અને નવી દિલ્હી મ્યુનિસિપલ કૉર્પોરેશનને તાત્કાલિક કૂતરાઓ માટે આશ્રયસ્થાન બનાવવા અને 8 અઠવાડિયામાં માળખાગત સુવિધાઓના નિર્માણ અંગે રિપોર્ટ રજૂ કરવાનો નિર્દેશ આપ્યો છે.

 

સુપ્રીમ કોર્ટે કહ્યું કે પકડાયેલા શ્વાનોને નસબંધી કરવા માટે પૂરતો સ્ટાફ હોવો જોઈએ, જે ત્યાં રાખવામાં આવશે અને જાહેર સ્થળોએ છોડવામાં આવશે નહીં. કોઈ પણ શ્વાનને બહાર ન લઈ જવામાં આવે તેની ખાતરી કરવા માટે સીસીટીવી કેમેરાનો ઉપયોગ કરવામાં આવશે. આગામી 6 અઠવાડિયામાં 5000 ડૉગ્સને પકડવાનું કામ શરૂ થઈ જવું જોઈએ. દિલ્હી, એમસીડી, એનએમડીસી, નોઇડા ઑથોરિટી, ગ્રેટર નોઇડા ઑથોરિટીએ બધા વિસ્તારોમાંથી, ખાસ કરીને સંવેદનશીલ વિસ્તારો અને શહેરોમાંથી રખડતા શ્વાનને ઉપાડવાનું શરૂ કરવું જોઈએ.