સન્ડે સ્ટ્રીટના ફન ઍન્ડ ફિટનેસમાં ત્રણ નવાં સ્થળનો થયો સમાવેશ

આજે ચેમ્બુર, કાંદિવલી-ઈસ્ટ અને દહિસરના લોકો એમાં સામેલ થઈને એની મજા માણશે

ફાઇલ તસવીર

સતત દોડતા રહેતા મુંબઈમાં રવિવારના દિવસે લોકો મોકળો શ્વાસ લઈ શકે અને થોડો સમય પોતાની મનગમતી પ્રવૃત્તિઓ છૂટથી કરી શકે એ માટે ફરી એક વાર સન્ડે સ્ટ્રીટનું આયોજન કરાઈ રહ્યું છે. એમાં આજે નવાં ત્રણ સ્થળોને સામેલ કરવામાં આવ્યાં છે. મુંબઈ પોલીસ દ્વારા આ બાબતે આગેવાની લેવાઈ છે. મુંબઈના પોલીસ કમિશનર સંજય પાંડેએ જાતે રનિંગ કરીને અને સાઇક્લિંગ કરીને ગયા અઠવાડિયે આ અભિયાન શરૂ કર્યું હતું અને લોકોને ફન ઍન્ડ ફિટનેસનો સંદેશ આપ્યો હતો. ત્રણ સ્થળોનો વધારો કરવામાં આવતાં એ વિસ્તારના લોકો પણ હવે એનો લાભ લઈ શકશે.  

પૂર્વના પરા ચેમ્બુરમાં સુધરાઈના ‘એમ’ ઈસ્ટ વૉર્ડમાં યુનિયન પાર્ક પાસે ચીમની ગાર્ડન પાસે આ આયોજન કરાયું છે, જ્યારે વેસ્ટર્ન સબર્બ્સમાં કાંદિવલી-ઈસ્ટમાં ઠાકુર વિલેજમાં દત્તા સોલાપુરી મિસલ-પાંઉવાળા પાસેથી એવરશાઇન મિલેનિયમ પૅરૅડાઇઝ ટાવર ૪૮ના કૉર્નર સુધીના પટ્ટામાં અને દહિસરમાં આઇસી કૉલોનીમાં હોટેલ બંજારા પાસેથી ગ્રીન ગાર્ડન તરફના રોડ પર સવારના ૬થી ૧૦ના સમયગાળામાં આ આયોજન કરવામાં આવ્યું છે. મુંબઈગરાનો આ અભિયાનને જબરદસ્ત રિસ્પૉન્સ મળ્યો છે. તેઓ જૉગિંગ, રનિંગ, સાઇક્લિંગ, યોગ, સ્કેટિંગ અને અન્ય રમતગમતની પ્રવૃત્તિ કરતાં નજરે ચડે છે.