એક બાજુ દુકાળ છે અને બીજી બાજુ ૧૨.૬૮ કરોડના ખર્ચે હાઈ-એન્ડ ગાડીઓ ખરીદવાનો સરકારનો નિર્ણય

૪ કરોડની લૅન્ડક્રૂઝર, ૩૨ ઇનોવા, બે ફૉર્ચ્યુનર સહિત કુલ ૪૪ કાર ખરીદવા રાજ્ય-પ્રશાસનને મંજૂરી

દેવેન્દ્ર ફડણવીસ

એક બાજુ રાજ્યમાં દુકાળની પરિસ્થિતિ છે ત્યારે રાજ્ય સરકારે VIP ગેસ્ટ માટે ૧૨.૬૮ કરોડ રૂપિયાના ખર્ચે કુલ ૪૪ હાઈ-એન્ડ કાર ખરીદવાની પ્રશાસકીય મંજૂરી આપી છે. આમાં સૌથી મોંઘી કાર ૪ કરોડ રૂપિયાની લૅન્ડક્રૂઝર છે. રાજ્ય સરકારના આ નિર્ણયનો રાજકીય વિરોધ થાય એવી શક્યતાઓ જણાઈ રહી છે.

રાજ્યમાં ઓછા વરસાદને કારણે ખેડૂતોની હાલત ખરાબ છે અને રાજ્ય સરકારે જ એથી ૨૬૫ તાલુકામાં દુકાળ જાહેર કર્યો છે ત્યારે જ VIP ગેસ્ટ માટે કરોડો રૂપિયાના ખર્ચે નવી કાર લેવાની મંજૂરી આપવામાં આવી છે. એથી આ મુદ્દે વિરોધીઓ સરકારને ઘેરે એવી પૂરી શક્યતા છે. 

ADVERTISEMENT

કઈ કાર કેટલી ખરીદાશે?

૧. ટૉયોટા ઇનોવા ક્રિસ્ટા (ડિફેન્સ/ડીઝલ) : ૩૨ કાર (દરેકની કિંમત અંદાજે ૨૦.૭૧ લાખ રૂપિયા)
૨. ટૉયોટા ફૉર્ચ્યુનર (ડીઝલ-4x2 મૅન્યુઅલ) : બે વાહન (દરેકની કિંમત ૩૦ લાખ રૂપિયા)
૩. ટૉયોટા લૅન્ડક્રૂઝર 300 (NIJ III/B6 લેવલ પ્રોટેક્શન બુલેટપ્રૂફ કાર એક (કિંમત ૪.૦૭ કરોડ)
૪. મારુતિ સુઝુકી અર્ટિગા (પેટ્રોલ): ૭ કાર (દરેકની કિંમત ૧૧.૫૯ લાખ રૂપિયા)
૫. ટોઇંગ વાહન (TATA 207 YODHA): એક (કિંમત ૯ લાખ રૂપિયા)
૬. એર્બેનિયા : એક બસ (૩૧ લાખ રૂપિયા)