જાલના પોલીસે ૪૪ ગેરકાયદેસર હથિયારો જપ્ત કર્યા, એક શખ્સની ધરપકડ

Jalna illegal weapons seizure: મહારાષ્ટ્રની જાલના પોલીસે અજમેરથી લાવવામાં આવેલા તલવારો અને છરા સહિત ૪૪ ગેરકાયદેસર ધારદાર હથિયારોનો જથ્થો જપ્ત કર્યો છે; આ મામલે ગુનાહિત ઇતિહાસ ધરાવતા ૨૩ વર્ષીય શંકાસ્પદ યુવકની ધરપકડ કરવામાં આવી છે

તસવીર સૌજન્યઃ એએનઆઈ

ધારદાર હથિયારોની ગેરકાયદેસર ખરીદી અને વેચાણ સામે એક મોટી કાર્યવાહીમાં, મહારાષ્ટ્ર (Maharashtra)ની જાલના (Jalna) પોલીસે ૪૪ ગેરકાયદેસર હથિયારો જપ્ત કર્યા છે અને ગુનાહિત ઇતિહાસ ધરાવતા ૨૩ વર્ષીય યુવકની ધરપકડ કરી છે. પોલીસ અધિકારીઓના જણાવ્યા અનુસાર, પ્રાથમિક તપાસમાં બહાર આવ્યું છે કે હથિયારોનો આ મોટો જથ્થો રાજસ્થાન (Rajasthan) ના અજમેર (Ajmer )થી વેચાણ અર્થે જિલ્લામાં સ્મગલિંગ કરીને લાવવામાં આવ્યો હતો.

તલવારો, છરા અને ચોપર્સનો મોટો જથ્થો જપ્ત

ADVERTISEMENT

જાલના શહેરમાં ધારદાર હથિયારોના પરિવહન અને સંગ્રહ અંગે મળેલી ચોક્કસ બાતમીના આધારે આ કામગીરી હાથ ધરવામાં આવી હતી. સબ-ડિવિઝનલ પોલીસ ઓફિસર (SDPO) અનંત કુલકર્ણીએ પુષ્ટિ કરી હતી કે, દરોડા દરમિયાન પોલીસ ટુકડીઓએ કુલ ૪૪ ગેરકાયદેસર ધારદાર હથિયારો કબજે કર્યા છે.

જપ્ત કરાયેલા જથ્થામાં ૨૨ તલવારો, ૧૫ છરા (Daggers) અને ચાર ચોપર્સ સહિત ગેરકાયદેસર વેચાણ માટે લાવવામાં આવેલી અન્ય ધારદાર વસ્તુઓનો સમાવેશ થાય છે. શંકાસ્પદ આરોપી જિલ્લામાં ગ્રાહકોને આ હથિયારો સપ્લાય કરે તે પહેલાં જ પોલીસે તમામ હથિયારો જપ્ત કરી લીધા હતા.

આંતરરાજ્ય સ્મગલિંગનું નેટવર્ક અજમેર સાથે જોડાયેલું

હથિયારોની સપ્લાય ચેઈનની તપાસમાં રાજસ્થાન સાથેના આંતરરાજ્ય કનેક્શનનો ખુલાસો થયો છે. SDPO અનંત કુલકર્ણીએ જણાવ્યું હતું કે પૂછપરછ દરમિયાન મળેલી પ્રાથમિક માહિતી મુજબ આ હથિયારો સીધા અજમેરથી ખરીદવામાં આવ્યા હતા.

પોલીસ અધિકારીઓએ નોંધ્યું હતું કે સ્થાનિક ખરીદદારોને ગેરકાયદેસર રીતે હથિયારો વેચવાના ઈરાદાથી આરોપી આ જથ્થો જાલના લાવ્યો હતો. ચેકપોસ્ટોને ચકમો આપી મહારાષ્ટ્રમાં આ ગેરકાયદેસર જથ્થો લાવવા માટે કયો રૂટ વાપરવામાં આવ્યો હતો તેની તપાસ હાલ પોલીસ કરી રહી છે.

મુખ્ય આરોપીની ધરપકડ; સહ-આરોપીને ઝડપી પાડવા ચક્રો ગતિમાન

આ કામગીરી દરમિયાન પોલીસે ૨૩ વર્ષીય મુખ્ય શંકાસ્પદ આરોપીની અટકાયત કરી હતી. વરિષ્ઠ અધિકારીઓએ ખુલાસો કર્યો હતો કે ધરપકડ કરાયેલા વ્યક્તિનો ભૂતકાળમાં ગુનાહિત ઇતિહાસ રહ્યો છે.

મુખ્ય આરોપી હાલ પોલીસ કસ્ટડીમાં છે, જ્યારે હથિયારોની ખરીદી અને લોજિસ્ટિક્સ નેટવર્કમાં સામેલ એક સહ-આરોપીની પણ ઓળખ કરી લેવામાં આવી છે. બીજા આરોપીને શોધી કાઢવા અને તેની ધરપકડ કરવા માટે સંભવિત અડ્ડાઓ પર દરોડા પાડવામાં આવી રહ્યા છે.

ખરીદદારો અને નેટવર્ક પર તપાસ કેન્દ્રિત

હથિયારો જપ્ત કર્યા બાદ જાલના પોલીસે આર્મ્સ એક્ટ અને મહારાષ્ટ્ર પોલીસ એક્ટની સંબંધિત કલમો હેઠળ ગુનો નોંધ્યો છે. આ જથ્થો કોને પૂરો પાડવાનો હતો તેની માહિતી મેળવવા માટે ટેકનિકલ સર્વેલન્સ ટીમ અને લોકલ ક્રાઇમ બ્રાન્ચના કર્મચારીઓને કામે લગાડવામાં આવ્યા છે.

ગેરકાયદેસર હથિયારોના આ સમગ્ર નેટવર્કને પૂરું કરવા માટે સત્તાવાળાઓ અજમેરમાં હથિયારોના મૂળ સ્ત્રોત, નાણાકીય વ્યવહારો અને જાલના તથા આસપાસના જિલ્લાઓમાં સંભવિત ખરીદદારો અંગે ઊંડાણપૂર્વક તપાસ કરી રહ્યા છે.