સ્ટૅચ્યુ ઑફ યુનિટીનો આઠમી અજાયબીમાં સમાવેશ
સમગ્ર દેશ અને દુનિયામાં ગરવી ગુજરાતના નામનો ડંકો વાગે એવી એક મોટી અને ઐતિહાસિક ઘટનામાં તથા પ્રત્યેક ગુજરાતી ગર્વ લઈ શકે એમ સરદારસાહેબના ગુજરાતમાં કેવડિયા નર્મદા ડૅમ નજીક આવેલી વિશ્વની સૌથી મોટી ૧૮૨ મીટર ઊંચી સ્ટૅચ્યુ ઑફ યુનિટી પ્રતિમાને દુનિયાની આઠમી અજાયબી તરીકે જાહેર કરવામાં આવી છે. વિદેશપ્રધાન એસ. જયશંકરે સોમવારે શાંઘાઈ સહયોગ સંગઠનના મહાસચિવ વ્લાદિમીર નેરોવ સાથે મુલાકાત કરી હતી. સ્ટૅચ્યુ ઑફ યુનિટીને આઠ અજાયબીમાં સામેલ કરાયું છે. ૮મા શ્રેષ્ઠ પ્રવાસન સ્થળ તરીકે સમાવાતાં ટૂરિસ્ટ ઇન્ડસ્ટ્રીઝને ફાયદો થશે. હાલ દુનિયાની ૭ અજાયબીઓમાં ભારતની એકમાત્ર ઇમારત એવા આગરા ખાતે આવેલા તાજ મહેલને જ સ્થાન અપાવામાં આવ્યું હતું, હવે સ્ટૅચ્યુ ઑફ યુનિટીને પણ આ દરજ્જો આપવામાં આવ્યો છે.