પરિણીત પ્રેમિકાના ઘરે ભૂતપૂર્વ પ્રેમીએ મોકલ્યો પાર્સલ-બૉમ્બ: યુવતીનાં પતિ અને દીકરીનો જીવ ગયો
ભૂતપૂર્વ પ્રેમીએ મોકલેલો પાર્સલ-બૉમ્બ ફાટ્યો એ પછી ઘર ખેદાનમેદાન થઈ ગયું હતું.
ગુજરાતના સાબરકાંઠાના વડાલી તાલુકાના વેડા ગામમાં પરિણીત પ્રેમિકાના પતિને તેના જ ઘરે મારવા માટે યુવતીના ભૂતપૂર્વ પ્રેમીએ મોકલેલો પાર્સલ-બૉમ્બ ગુરુવારે ફાટતાં પિતા-પુત્રીનાં મૃત્યુ થયાં હતાં. પોલીસે આ કેસમાં આરોપીની કલાકોમાં જ ધરપકડ કરી હતી.
આ ઘટનામાં ૩૨ વર્ષના જિતેન્દ્ર હીરાભાઈ વણજારાનું ઘટનાસ્થળે જ મૃત્યુ થયું હતું અને તેની ૧૨ વર્ષની દીકરી ભૂમિકાએ હૉસ્પિટલમાં લઈ જતી વખતે છેલ્લા શ્વાસ લીધા હતા. આ બનાવ બન્યો ત્યારે જિતેન્દ્રની પત્ની ઘરે નહોતી. બીજી તરફ જિતેન્દ્રની ૯ અને ૧૦ વર્ષની બીજી બે દીકરીઓ પણ ઘાયલ થઈ હતી અને તેમને વધુ સારવાર માટે અમદાવાદ મોકલી દેવામાં આવી છે જેમાંથી એકને વેન્ટિલેટર પર રાખવામાં આવી છે.
ADVERTISEMENT
આ ઘટના વિશે સિનિયર પોલીસ અધિકારી વિજય પટેલે આપેલી જાણકારી મુજબ ૩૧ વર્ષના આરોપી જયંત બાલુસિંહ વણજારાએ ઑટોરિક્ષામાં બૉમ્બ ધરાવતું પાર્સલ મોકલ્યું હતું જે એક ટેપ-રેકૉર્ડર જેવું જ દેખાતું હતું. જિતેન્દ્રએ એ પાર્સલ ખોલતાં જ ધડાકો થયો હતો. આ પાર્સલમાં મોકલેલો ઇમ્પ્રૂવાઇઝ્ડ બૉમ્બ બનાવવા માટે જયંત રાજસ્થાન ગયો હતો અને તેણે જિલેટિન સ્ટિક્સ અને ડિટોનેટર ખરીદ્યાં હતાં. બૉમ્બનું ટેપ-રેકૉર્ડર જેવું પૅકિંગ કરવામાં આવ્યું હતું અને એ ઑન કરતાંની સાથે જ ધડાકો થયો હતો. જે ઑટોરિક્ષામાં આ બૉમ્બ મોકલવામાં આવ્યો હતો એના ડ્રાઇવરની ક્લોઝ્ડ સર્કિટ ટેલિવિઝન (CCTV) ફુટેજના આધારે ઓળખ કરીને તેનું નિવેદન નોંધવામાં આવ્યું હતું અને એના આધારે આરોપીને ઝડપી લેવા માટે પોલીસે વિશેષ ટીમ તૈયાર કરી હતી અને ધડાકાના થોડા કલાક બાદ જયંતીની ધરપકડ કરવામાં આવી હતી. જિતેન્દ્રની પત્ની જયંતીની એક્સ-ગર્લફ્રેન્ડ હતી અને તેનાં જિતેન્દ્ર સાથે થયેલાં લગ્ન તેને ગમ્યાં નહોતાં એટલે જિતેન્દ્રને મારવા માટે તેણે બૉમ્બ ધરાવતું પાર્સલ મોકલ્યું હતું.
