બે કરોડ રૂપિયાથી વધુ કિંમતના ૪૦૬ કિલોથી વધુ ગાંજાના જથ્થા સાથે અમદાવાદની ક્રાઇમ બ્રાન્ચે મહારાષ્ટ્રના બે જણને પકડ્યા
કાંદાની ગૂણીઓમાં ગાંજો છુપાવીને લાવ્યા હતા.
કાંદાની આડમાં ગાંજાની હેરાફેરી કરતા બે આરોપીઓને બે કરોડથી વધુની કિંમતના ૪૦૬.૩૫૦ કિલો ગાંજાના જથ્થા સાથે અમદાવાદ શહેરની ક્રાઇમ બ્રાન્ચે ઝડપી લીધા હતા.
ક્રાઇમ બ્રાન્ચને બાતમી મળી હતી કે શુક્રવારે રાતે એક પિક-અપ ગાડીમાં મહારાષ્ટ્ર તરફથી કાંદાના જથ્થાની આડમાં ગેરકાયદે ગાંજાનો જથ્થો લાવવામાં આવી રહ્યો છે. આ માહિતી મળતાં ક્રાઇમ બ્રાન્ચે વૉચ ગોઠવી હતી અને અમદાવાદના નારોલ સર્કલ પાસે એક પિક-અપ ગાડીને રોકીને તપાસ કરતાં કાંદાની આડમાં કુલ ૪૦૬.૩૫૦ કિલો ગાંજાનો જથ્થો મળી આવ્યો હતો. આ જથ્થો લઈ આવનાર મહારાષ્ટ્રના ધુળે જિલ્લાના શિરપુર તાલુકાના હેદારીપાટામાં રહેતા દીપક જાટ અને ધુળે જિલ્લાના શિરપુર તાલુકાના જોઇદા ગામના સતેસ ઉર્ફે સતેજ પાવરાની ધરપકડ કરી હતી. તેમની સામે ગુનો નોંધીને વધુ તપાસ શરૂ કરવામાં આવી છે.
પકડાયેલા આરોપીઓની પોલીસે કરેલી પ્રાથમિક પૂછપરછમાં એવું જાણવા મળ્યું હતું કે આ ગાંજાનો જથ્થો મધ્ય પ્રદેશ અને મહારાષ્ટ્ર સરહદ પર આવેલા કરમાલા ગામ ખાતેથી સાગર પાવરા તથા શાંતારામ પાવરા નામની વ્યક્તિઓએ ભરી આપ્યો હતો. આ જથ્થો અમદાવાદમાં આપવાનો હતો.
