વડોદરા: જાહેરમાં થૂંકનાર કે કચરો ફેંકનાર સાવધાન... ઘરે ઈ-મેમો મોકલાશે
જાહેરમાં થૂંકનાર કે કચરો ફેંકનાર સાવધાન
અમદાવાદ અને રાજકોટની જેમ હવે વડોદરામાં પણ જાહેરમાં રોડ પર થૂંકવા બદલ દંડ કરવામાં આવશે.વડોદરા કૉર્પોરેશનમાં ગઈ કાલે સ્માર્ટ સિટી બોર્ડની મીટિંગ મળી હતી જેમાં થયેલી ચર્ચા મુજબ રોડ પર કચરો ફેંકનારને, રોડ પર ચાલુ વાહને અથવા ચાલતા જનાર થૂંકે અથવા રોડ પર જાહેરમાં લઘુશંકા કરે કે પછી જાહેર મિલકતને નુકસાન પહોંચાડે તો સીસીટીવી કૅમેરા મારફતે ઝડપી પાડીને ઇ-ચલણ ફટકારીને દંડ કરવામાં આવશે. ટૂંક સમયમાં જ આ માટેનું માળખું ગોઠવી દેવામાં આવશે. કોને કેટલો દંડ કરવો એ પણ નક્કી કરવામાં આવશે. ઉલ્લેખનીય છે કે સ્માર્ટ સિટી પ્રોજેક્ટ હેઠળ વડોદરામાં ઠેકઠેકાણે સીસીટીવી કૅમેરા મૂકવામાં આવ્યા છે.
આ પણ વાંચો: સિંહોના સંરક્ષણ માટે ફાળવેલા 350 Cr.ની કામગીરી ઝડપથી પૂરી થશેઃCM રૂપાણી
