યુરોપની સૌપ્રથમ અન્ડરવૉટર રેસ્ટોરાં શરૂ થઈ નૉર્વેમાં,
નોર્વેની અન્ડર વૉટર રેસ્ટોરન્ટ
નૉર્વેના બેઇલીમાં ‘અન્ડર’ નામની યુરોપની સૌપ્રથમ અન્ડરવૉટર રેસ્ટોરાં હજી ગયા અઠવાડિયે જ શરૂ થઈ છે. નૉર્વેજિયન ભાષામાં અન્ડરનો અર્થ અંગ્રેજીમાં વન્ડર અને ગુજરાતીમાં આર્ય થાય છે. આ રેસ્ટોરાં અડધી પાણીમાં ડૂબેલી હોય એવી દેખાય છે. ૩૪ મીટર લાંબી હોટેલનો આગળનો ભાગ પાણીની બહાર ખડક પર છે અને છેલ્લો ભાગ પાણીની અંદર ૧૬ ફુટ ઊંડે સુધી ડૂબેલો છે. આમ તો એની કૅપેસિટી એકસાથે ૪૦થી ૪૫ લોકોને ડિનર કરાવી શકે એવી છે, પરંતુ લોકોને આ નવો અનુભવ લેવાની એટલી ઉત્સુકતા છે કે અત્યારે ૭૦૦૦ લોકોએ ઍડ્વાન્સ બુકિંગ કરાવી લીધું છે. રેસ્ટોરાંનો અંદરનો ભાગ ઍક્વેરિયમ જેવો લુક ધરાવે છે. ભોજન લેતાં-લેતાં ગ્લાસ-વૉલની બીજી તરફ પાણીના મુક્ત જીવોને જોઈ-માણી શકાય છે. અહીં માત્ર દરિયાઈ જીવોને જોવાની જ મજા નથી, એમના સથવારે બેસીને ૧૮ કોર્સ ભોજન પણ માણવાની મજા છે. જોકે આ અનુભવ બહુ એક્સ્પેન્સિવ છે. એક વ્યક્તિ માટેનું ભોજન ૩૮૦ યુરો એટલે કે લગભગ ૩૦,૦૦૦ રૂપિયામાં પડે.
