ભર્ગસેતુ શર્માઃ જાણો Roadies સુધી પહોંચનારી રિયલ હીરોની કહાની

ભાવિન રાવલ | વડોદરા | Apr 08, 2019, 14:41 IST

જાણો વડોદરાની યુવતી વિશે જે એનસીસીમાં બેસ્ટ કેડેટ બની, રક્ષા મંત્રી પદક મેળવ્યો, બ્રેવરી એવોર્ડ મેળવ્યો, પશુઓની સેવા માટે ગ્રુપ બનાવ્યુ અને એક યુવકને મોતના મુખમાંથી બચાવ્યો છે. વાંચો ભર્ગસેતુ શર્માની કહાની

ભર્ગસેતુ શર્માઃ જાણો Roadies સુધી પહોંચનારી રિયલ હીરોની કહાની
ભર્ગસેતુ શર્મા

 

1) સ્કૂલમાં NCC A સર્ટિફિકેટ હોલ્ડર
2)NCC B, C સર્ટિફિકેટ ગ્રેજ્યુએશનમાં મેળવ્યા
3) ખેલમહાકુંભમાં ફ્રીસ્ટાઈલ સ્વિમિંગમાં સિલ્વર મેડલ
4) C સર્ટિફિકેટની એક્ઝામમાં બેસ્ટ કેડેટ ઓફ ગુજરાત
5) નેવીના ઓલ ઈન્ડિયા નૌ સૈનિક કેમ્પમાં ગુજરાતનું પ્રતિનિધિત્વ
6) બેસ્ટ ફાયરર, બેસ્ટ કેડેટ, પરેડ કમાન્ડર તરીકે રિપ્રેઝન્ટ કર્યું
7) સ્ટેટ લેવલનો બ્રેવરી એવોર્ડ
8) 2019 રક્ષામંત્રી પદક હોલ્ડર
9) ગુજરાત ગવર્નર મેડલ
10) આર્મી એરિયાના હૉલ ઓફ ફૅમમાં સ્થાન

માત્ર 21 વર્ષની ઉંમરે આ છે ગુજરાતી યુવતી ભર્ગસેતુ શર્માની સિદ્ધિઓ. જી હાં, પહેલીવાર કદાચ માનવું જ મુશ્કેલ બને પરંતુ 21 વર્ષની ઉંમરે ભર્ગસેતુ આ સફળતા મેળવી ચૂકી છે. ભર્ગસેતુ શર્મા વડોદરાની છે. જે હાલ વડોદરાની એમ. એસ. યુનિવર્સિટીઝમાં ઝૂઓલોજીનો અભ્યાસ કરે છે. પણ તેના અભ્યાસ કરતા તેની ઈતરપ્રવૃત્તિઓ જાણવા જેવી છે. ભર્ગસેતુની દરેક સિદ્ધિ પાછળ તેની મહેનતની સાથે સાથે તેનો સ્વભાવ કારણભૂત રહ્યો છે.

આ રીતે બન્યું humans with humanity

જાણીતા રિયાલિટી શૉ રોડીઝમાં ભાગ લઈ ચૂકેલી ભર્ગસેતુ શર્મા રિયલ હીરો છે. ભર્ગસેતુની રિયલ હીરોની સફર સુધી શરૂ થઈ તેના પ્રાણીઓ પ્રત્યેના પ્રેમથી. ભર્ગસેતુના જ શબ્દોમાં જાણીએ તો,'ઘટના 2012ની છે, અમારી સોસાયટીના કૂતરાના બચ્ચાઓને પાડોશીઓ ફેંકી આવ્યા હતા. અને મને આ ન ગમ્યું. અમે NGOને વાત કરી, પોલીસ કમ્પલેન કરી. આખરે કૂતરાના બચ્ચાઓને પાછા લાવ્યા. ત્યારે હું 14 વર્ષની હતી. બસ ત્યારે એવું લાગ્યુ કે અમે કરી શકીએ છીએ.' બસ પછી તો ભર્ગસેતુએ નક્કી કર્યું કે પ્રાણીઓ માટે કંઈક કરવું જોઈએ. નાની ઉંમરે ભર્ગસેતુએ લીધેલા આ નિર્ણયને તેના પરિવારે પણ ટેકો આપ્યો. એટલે સુધી કે રેસ્ક્યુ કરવા જવાનું થાય તો ભર્ગસેતુના પપ્પા પણ તેની સાથે જતા. ભર્ગસેતુ કહે છે કે ધીરે ધીરે બધાને મારા કામ વિશે ખબર પડી, તો રેસ્કયુ કૉલ વધવા લાગ્યા. પહોંચી નહોતું વળાતું. એટલે સોશિયલ મીડિયાનો સહારો લેવાનું નક્કી કર્યું. અને આ રીતે હ્યુમન્સ વીથ હ્યુમેનિટી પેજની શરૂઆત થઈ.

bhargsetu

ભર્ગસેતુને ગમે છે પ્રાણીઓ

ધીરે ધીરે કરતા ભર્ગસેતુના આ પ્રયાસમાં 80 લોકો જોડાયા. અને ભર્ગસેતુ એનિમલ લવર તરીકે આખા વડોદરામાં પ્રખ્યાત થઈ ગઈ. આજે ઈન્સ્ટાગ્રામ, ફેસબુક પર આ પેજના સંખ્યાબંધ ફોલોઅર્સ છે. માત્ર 14 વર્ષની ઉંમરે ભર્ગસેતુએ લીધેલા એક નિર્ણયે તેની જીંદગીને નવો જ વળાંક આપી દીધો. પ્રાણીઓ પ્રત્યેના પ્રેમે તેને કંઈક અલગ કરવા પ્રેરી દીધી. પરંતુ ભર્ગસેતુ આટલાથી અટકે એમ નહોતી. મદદ અને હિંમત તેના લોહીમાં છે. અને એક ઘટનાએ આ વાત સાબિત કરી આપી. જેના માટે ભર્ગસેતુને બ્રેવરી એવોર્ડ પણ મળ્યા છે.

મોતના મુખમાંથી યુવાનને બચાવ્યો

ભર્ગસેતુ એ દિવસને યાદ કરતા કહે છે કે,'દરેક ઉનાળામાં હુમન્સ વીથ હ્યમાનિટીની મીટિંગ કરીએ. 13 મે, 2018ના રોજ પણ આવી જ એક મીટિંગ થઈ. રવિવારનો દિવસ હતો. અમારી આખી ટીમે શેરીના કૂતરાઓને નવડાવ્યા. પછી ફરવા જવાનું નક્કી કર્યું. અને રસલપુર, સાવલી પાસેથી પસારથી મહી રિવરમાં બધા નહાવા પડ્યા. હું નદીનું ઉંડાણ વધુ હતું ત્યાં નહાતી હતી. બીજા 15-16 છોકરાઓ પણ નહાતા હતા. ખૂબ ભીડ હતી. ત્યારે જ અચાનક બચાવો બચાવોની બૂમો પડી. થોડીવારમાં ખબર પડી કે બે છોકરાઓ ડૂબે છે. એટલે હું પણ એક ઉંચી જગ્યાએ ચડીને જોવા લાગી કે ક્યાં ડૂબે છે.

Bhargsetu-nitin-patel

નીતિન પટેલે પણ કર્યું સન્માન

એટલીવારમાં એક સ્થાનિક તરવૈયાએ એક યુવકને બચાવી લીધો, પરંતુ બીજા છોકરાની ભાળ નહોતી મળતી. મેં હિંમત કરીને ડીપ ડાઈવ કરી. 10 મિનિટ સુધી શોધખોળ કરી, પણ એ છોકરો ન મળ્યો આખરે 11મી મિનિટે નદીના તળિયે 25 ફૂટ નીચેથી તેનું બોડી મળી આવ્યું. અહીં ભર્ગસેતુ સ્પષ્ટતા કરીને કહે છે. બોડી એટલા માટે કે તેની પલ્સ નહોતી મળતી, કાર્ડિયાક અરેસ્ટની સ્થિતિ હતી. આ છોકરાના શરીરમાં એટલું પાણી જતું રહ્યું હતું કે શ્વાસ જ નહોતો લઈ શક્તો. ભર્ગસેતુએ તેને CPR આપ્યા. અને લાફા મારી મારીને છોકરાને શ્વાસ લેતો કર્યો. ત્યાં સુધીમાં એમ્બ્યુલન્સ આવી. અને પ્રાથમિક તપાસમાં ખબર પડી કે 10 મિનિટ પહેલા છોકરાનું હ્રદય બંધ હતું. એટલે કે છોકરો મોતને અડીને પાછો આવ્યો હતો. માત્ર ભર્ગસેતુની હિંમત અને પ્રયાસને કારણે.

સરકાર કરી ચૂકી છે સન્માન

આ જ હિંમત માટે ભર્ગસેતુને ડેપ્યુટી સીએમ નીતિન પટેલના હસ્તે સ્ટેટ લેવલનું બ્રેવરી સર્ટિફિકેટ મળી ચૂક્યુ છે. તો નેશનલ લેવલ પર માત્ર એક જ વ્યક્તિને મળતું રક્ષામંત્રી પદક સન્માન પણ 2019માં મળ્યું છે. આ ઉપરાંત દિલ્હીના આર્મી એરિયાના હોલ ઓફ ફેમમાં ભર્ગસેતુનું નામ સામેલ થઈ ચુક્યુ છે. અને ગવર્નર ઓ. પી. કોહલીના હસ્તે ગુજરાત ગવર્નર મેડલથી પણ ભર્ગસેતનું સન્માન થઈ ચૂક્યુ છે. '

bhargsetu raksha padak

નિર્મલા સીતારમન પાસેથી પદક સ્વીકારી રહેલી ભર્ગસેતુ

ભર્ગસેતુ NCCમાં એ, બી, સી એ ત્રણેય સર્ટિફિકેટ મેળવી ચૂકી છે. એમાંય સી સર્ટિફિકેટ માટેની પ્રેક્ટિકલ અને થિયરી બંને એક્ઝામમાં તો તે બેસ્ટ કેડેટ ઓફ ગુજરાત બની હતી. તો 2016માં NCCના INS કદમ્બ નેવીના ઓલ ઈન્ડિયા નૌ સૈનિક કેમ્પમાં બેસ્ટ ફાયરર, બેસ્ટ કેડટ અને પરેડ કમાન્ડર તરીકે ભર્ગસેતુ ગુજરાતને રિપ્રેઝન્ટ કરી ચૂકી છે.

Bhargsetu_roadies

Roadiesના શૂટ દરમિયાન ભર્ગસેતુ

આટલું વાંચીને જ તમને ભર્ગસેતુ શર્મા વિશે માન થઈ જાય. અને ભર્ગસેતુની આ જ સિદ્ધિઓના લીધે તેને રિયાલિટી શૉ રોડીઝ - રિયલ હિરોઝમાં એન્ટ્રી મળી હતી. જો કે ભર્ગસેતુ માટે કદાય સ્કાય ઈઝ ધ લિમિટ એ વાત પર્ફેક્ટ છે.

Bhargsetu_sharma

એનસીસીમાં પણ કરી છે કમાલ

સિતારોં સે આગે જહાં ઔર ભી હૈ

હાલ રોડીઝમાં ભાગ લીધા બાદ લાઈફ કેટલી બદલાઈ એ સવાલના જવાબમાં ભર્ગસેતુ કહે છે રિયાલિટી શૉ છતાંય મારી લાઈફ બદલાઈ નથી, પણ જવાબદારી જરૂર વધી છે. આશ્ચર્યજનક વાત એ પણ છે કે ભર્ગસેતુએ હજી સુધી કોઈની પાસેથી ફાઈનાન્સિયલ હેલ્પ લીધી નથી. અને પ્રાણીઓને સાચવી શકાય એ માટે તે દાદા-દાદી સાથે રહે છે. ભવિષ્યમાં ભર્ગસેતુ હુમન્સ વીથ હ્યુમાનિટીને કાયદેસર રીતે ઓર્ગેનાઈઝેશન બનાવવા ઈચ્છે છે. અત્યાર સુધી પ્રાણીઓને રેસ્ક્યુ કરતા હતા હવે તે સારી સ્થિતિમાં રહી શકે તે પ્રકારનું કામ કરવું છે. ભર્ગસેતુ વડોદરામાં એનિમલ હોસ્ટેલ પણ ખોલવા ઈચ્છે છે.

આ પણ વાંચોઃ ધોમધખતા ઉનાળામાં ઠંડક મેળવવા જાઓ ગુજરાતની આ જગ્યાઓએ

માત્ર 21 વર્ષની ઉંમરમાં ભર્ગસેતુએ એટલું કામ કર્યું છે જે કદાચ સામાન્ય વ્યક્તિને આખા જીવનમાં કરવા ન મળે. ત્યારે ભર્ગસેતુને આપણે એટલું જ કહીએ Keep it up અને Best Of Luck.

 
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK