વાયેગ્રા પછી ઉત્થાન આવે, પણ માથું ભારે થઈ જાય છે

તમે જે પ્રયોગો કરીને ઉત્તેજના લાવવાની કોશિશ કરો છો એ સારું છે, પણ મારી સલાહ છે કે તમારે પ્રાઇમરી બૉડી ચેકઅપ કરાવી લેવું જોઈએ

પ્રતીકાત્મક તસવીર

મારી ઉંમર ૪૮ વર્ષની છે. ક્યારેક બહુ પ્રયત્ન છતાં પણ ઉત્તેજના નથી આવતી. પહેલાં પૉર્ન ક્લિપ્સ જોઈને સરળતાથી કામ થઈ જતું, પણ હમણાંથી તો એ પણ અસરકારક નથી રહ્યું. વાઇફને બહુ રસ નથી પડતો, છતાં મહિને એકાદ-બે વાર અમે સંભોગ કરી લઈએ છીએ. બરાબર સમાગમ થઈ શકે એ માટે વિદેશી વાયેગ્રા લઉં તો ઉત્તેજના આવે છે અને ટકે પણ છે. જોકે જ્યારે પણ આ દવા લઉં છું એના બીજા દિવસે માથું બહુ ભારે લાગે અને ઝીણું-ઝીણું દુખ્યા કરે. હાથ-પગમાં ક્યારેક ઝણઝણાટી થાય છે તો પગમાં આછી સરખી કળતર થયા કરે છે. શું આ બધી વાયેગ્રાની આડઅસરો છે? નિયમિત વાયેગ્રા લેવાથી લાંબા ગાળે તકલીફ થાય?

જોગેશ્વરી

ADVERTISEMENT

લાગે છે કે તમને ઇન્દ્રિયમાં ઉત્તેજના આવવાની સમસ્યા આજકાલની નહીં, પણ ઘણા વખતથી છે. તમે જે પ્રયોગો કરીને ઉત્તેજના લાવવાની કોશિશ કરો છો એ સારું છે, પણ મારી સલાહ છે કે તમારે પ્રાઇમરી બૉડી ચેકઅપ કરાવી લેવું જોઈએ. ડાયાબિટીઝ, બ્લડ-પ્રેશર અને કૉલેસ્ટરોલનું પ્રમાણ ચકાસવાની ટેસ્ટ કરાવવી જરૂરી છે. ઇરેક્શનની સમસ્યા લઈને આવેલા ઘણા પેશન્ટ્સમાં બૉડી ચેકઅપ પછી આ પ્રકારની તકલીફ બહાર આવતી હોય છે, જે આમ જોઈએ તો સારું પણ છે કે માત્ર ઇરેક્શનની સમસ્યા દ્વારા આ મોટી સમસ્યાનું નિદાન મળી જાય અને સમયસર એની ટ્રીટમેન્ટ શરૂ થઈ જાય.

શું તમને બ્લડ-પ્રેશરની તકલીફ છે? અન્ય કોઈ એવી સમસ્યા છે જેની માટે તમારી કોઈ મેડિકેશન ચાલુ હોય? આ બધાને ધ્યાનમાં લેવું જરૂરી છે. આમ તો વાયેગ્રા લીધા પછી માથું દુખવું એ એક કૉમન આડઅસરનું જ લક્ષણ છે, પરંતુ તમને ઇન્દ્રિય ઉત્થાનમાં કેમ તકલીફ પડે છે એનું મૂળ કારણ સમજવા માટે થઈને ઉપર જણાવ્યા મુજબનાં નિદાન ટેસ્ટ કરાવવાં જરૂરી છે.

બને ત્યાં સુધી વાયેગ્રા કે અન્ય કોઈ પણ દવાઓ જાતે જ લેવાનું શરૂ કરવાને બદલે ફૅમિલી ડૉક્ટરની સલાહ લઈને પછી જ આગળ વધવું અને માટે જ તમને સલાહ છે કે તમે તમારા ફૅમિલી ડૉક્ટરને મળી એક વાર જરૂરી બધા રિપોર્ટ્સ કરાવો અને એ પછી તેમની સલાહ મુજબ વાયેગ્રા કે પછી તે જે સજેસ્ટ કરે એ દવા લેવાનું શરૂ કરો.