ઉર્ફી જાવેદ તેની ફેશન-સેન્સને લઈને હંમેશાં ચર્ચામાં રહે છે
ઉર્ફી જાવેદ અને ચેતન ભગત
ફિલ્મમેકર ચેતન ભગતે કરેલી કમેન્ટને લઈને ઉર્ફી જાવેદે તેને સણસણતો જવાબ આપ્યો છે. ઉર્ફી જાવેદ તેની ફેશન-સેન્સને લઈને હંમેશાં ચર્ચામાં રહે છે. તાજેતરમાં ચેતન ભગતે લિટરેચર ફેસ્ટિવલમાં હાજરી આપી હતી એ દરમ્યાન તેણે જણાવ્યું હતું કે ઉર્ફી યુવાઓનું ધ્યાન ભટકાવે છે. એ વિશે ચેતન ભગતે કહ્યું કે ‘યુવાઓ માટે ફોન એ ભટકાવવાનું મુખ્ય માધ્યમ છે, ખાસ કરીને છોકરાઓને. તેઓ ઇન્સ્ટાગ્રામ રીલ્સને જોવામાં કલાકો બગાડી નાખે છે. હાલમાં બધાને ખબર છે કે ઉર્ફી જાવેદ કોણ છે. આપણા દેશની સુરક્ષામાં જવાનો ખડેપગે સીમા પર ઊભા રહે છે અને આપણા યુવાનો ઉર્ફી જાવેદના ફોટો જોવામાં વ્યસ્ત છે.’
ચેતન ભગતનું નામ #MeeTooમાં પણ સંડોવાયેલુ હતું. તો તેમને જડબાતોડ જવાબ આપવામાં ઉર્ફીએ પણ મોડું નહોતું કર્યું. ઇન્સ્ટાગ્રામ પર એક વિડિયો શૅર કરીને ઉર્ફીએ કૅપ્શન આપી હતી, ‘તેમના જેવા પુરુષો પોતાની ખામીનો સ્વીકાર કરવાને બદલે હંમેશાં મહિલાઓને જ દોષ દે છે. હંમેશાં છોકરીની જ ભૂલ નથી હોતી અથવા તો છોકરી શું પહેરે છે એને દોષ ન આપી શકાય. નાહક મને વિવાદમાં ન ઘસડો. મારાં કપડાં યુવાનોને ગેરમાર્ગે દોરે છે એવું તમારું કહેવું અયોગ્ય છે. છોકરીઓને ખરાબ મેસેજ મોકલવા એ શું સારી બાબત છે? મને એ સમજ નથી પડતી કે લિટરેચર ફેસ્ટિવલમાં મારા નામનો ઉલ્લેખ કરવાની જરૂર શું છે?’
